Í þessum byrjunaráfanga í frönsku tileinka nemendur sér undirstöðuatriði tungumálsins. Nemendur eru þjálfaðir jöfnum höndum í öllum færniþáttum tungumálsins, hlustun, lestri, samskiptun, frásögn og ritun í samræmi við evrópska tungumálarammann.
Áhersla er lögð á framburð, orðaforða og grunnbyggingu frönskunnar ásamt því að kynnast franskri menningu og menningu annarra frönskumælandi landa.
Áhersla er á einstaklingsmiðað nám og að nemendur fylgist stöðugt með námi sínu og framförum í samræmi við evrópsku tungumálamöppuna.
Leitast er við að nemendur geti notað frönskukunnáttu sína við ýmsar einfaldar aðstæður í daglega lífinu, eins og almennar kveðjur, kynningu á sjálfum sér og öðrum, þúun og þérun, fjölskyldu, tómstundir og áhugamál.
enginn undanfari
Nemandi skal hafa öðlast þekkingu og skilning á:
orðaforða sem nauðsynlegur er til að mæta hæfnimiðum áfangans
grunnþáttum franska málkerfisins
einföldum aðstæðum í daglegu lífi, menningu og siðum í Frakklandi og öðrum frönskumælandi löndum
mismun á töluðu og rituðu máli og mismunandi notkun tungumálsins í daglegum samskiptum
Nemandi skal hafa öðlast leikni í að:
greina talað mál í einföldum setningum og fyrirmælum um kunnugleg og skilið helstu kveðjur og kurteisisávörp þegar talað er hægt og skýrt
lesa og greina ýmsa einfalda texta og hagnýt skilaboð úr daglega lífinu
taka þátt í einföldum samræðum og tjá sig um efni sem hann þekkir
tjá sig um sjálfan sig, fjölskyldu sína og atburði daglegs lífs með því að beita grunnorðaforða
beita viðeigandi hljómfalli, mál- og samskiptavenjum við mismunandi aðstæður í daglegu lífi
segja frá sjálfum sér og sínu nánasta umhverfi á einfaldan skýran hátt með viðeigandi orðaforða, málvenjum og framburði
skrifa einfaldar rétt uppbyggðar setningar um kunnuglegt efni
afla sér upplýsinga með hjálpargögnum eins og orðabókum í frönskunáminu sínu
Nemandi skal geta hagnýtt þá almennu þekkingu og leikni sem hann hefur aflað sér til að:
hlusta á og greina einfalt talað mál um kunnuglegt efni eins og um sjálfa/n sig og sitt nánasta umhverfi, draga viðeigandi ályktanir og bregðast við þeim
rökstyðja og bera saman einfaldar setningar, skilaboð eða texta um daglegar athafnir
leggja grunn að einföldum samræðum þannigað hann rökstyðji, spyrji og svari einföldum, algengum spurningum um kunnug málefni
draga ályktanir og nota einföld orðasambönd og setningar til þess að segja frá sjálfum sér og nánasta umhverfi sínu
skipuleggja og rökstyðja í einföldum skapandi skrifum
Fjölbreytt námsmat endurspeglar markmið áfangans í öllum færniþáttum í samræmi við evrópsku tungumálamöppuna (ETM). Lokaeinkunn byggir á kennara-, sjálfs- og jafningjamati á virkni og verkefnaskilum nemenda, þar sem færniþættirnir lesskilningur, hlustun, tal og ritun, auk málfræði eru metnir.