Áfanginn snýst fyrst og fremst um að skoða nám og störf að loknum framhaldsskóla. Unnið er að því að nemendur séu vel í stakk búnir til að marka sér framtíð og bera ábyrgð á námsvali sínu að loknu stúdentsprófi. Áhersla er lögð á að nemendur séu meðvitaðir um þá mörgu námsmöguleika sem standa þeim til boða í áframhaldandi námi. Fjallað verður um helstu áhrifaþætti í náms- og starfsvali og áhersla lögð á að nemendur geri sér grein fyrir samhengi menntunar og atvinnumöguleika.
Í áfanganum er einnig fjallað um ýmis hagnýt atriði er lúta að brautskráningu.
Nemandi skal hafa öðlast þekkingu og skilning á:
gerð náms- og starfsferilsskráa
kenningu John Holland um áhugasvið
framboði á námi hérlendis sem erlendis og leiðum til að afla upplýsinga um nám og störf
ýmsum hagnýtum atriðum sem snerta nám að loknu stúdentsprófi s.s. lánamöguleika og húsnæðismál
Nemandi skal hafa öðlast leikni í að:
meta áhugasvið sitt og hæfni á raunhæfan máta
finna upplýsingar um nám og störf og átta sig á kröfum sem gerðar eru til einstaklinga í mismunandi námi og störfum
skoða ólík störf og starfsumhverfi sem þeim tengist
Nemandi skal geta hagnýtt þá almennu þekkingu og leikni sem hann hefur aflað sér til að:
þróa náms- og starfsferil sinn á uppbyggilegan hátt
velja sér áframhaldandi nám af ábyrgð út frá hæfni sinni og áhuga
nýta styrkleika sína sem best
Námsmat er tilgreint í kennsluáætlun og samræmist skólanámskrá.