Í áfanganum kynnast nemendur helstu fyrirtækjum í nærsamfélaginu og þeim möguleikum sem þau bjóða upp á með tilliti til atvinnuþátttöku. Nemendur fá kynningu á helstu reglum (skrifuðum sem óskrifuðum) sem gilda á vinnustöðum og farið er yfir almenn samskipti á vinnustað. Nemendur fá fræðslu um réttindi og skyldur starfsmanna á almennum vinnumarkaði og farið er yfir almenna öryggis- og hollustuhætti á vinnustöðum.
Nemandi skal hafa öðlast þekkingu og skilning á:
atvinnutækifærum og fyrirtækjum í nærsamfélaginu
þeim atriðum sem taka ber tillit til við starfsval
tilgangi starfa og mikilvægi þeirra í tengslum við önnur störf
eigin styrkleikum og mikilvægi góðra samskipta
reglum, öryggi og hollustuháttum á almennum vinnustöðum
réttindum og skyldum launþega.
Nemandi skal hafa öðlast leikni í að:
flokka atvinnufyrirtæki eftir eðli þeirra
meta eigin kunnáttu og reynslu með tilliti til starfsvals
bera ábyrgð á sjálfum sér og eigin gjörðum, t.d. að mæta á réttum tíma til vinnu
taka þátt í samræðum, bera virðingu fyrir skoðunum annarra og sýna umburðarlyndi
þekkja réttindi sín og skyldur sem launþegi
meta hættur í vinnuumhverfi.
Nemandi skal geta hagnýtt þá almennu þekkingu og leikni sem hann hefur aflað sér til að:
taka þátt í atvinnulífinu
velja sér starfsvettvang
vera ábyrgur starfsmaður
gera sér grein fyrir samhengi milli atvinnugreina
vera hæfur til samvinnu
nýta sér hlífðarbúnað og hjálpartæki á vinnustað og forðast hættur.
Í áfanganum er gert ráð fyrir leiðsagnarmati en í því felst að nemandinn fái með reglulegum og skipulegum hætti upplýsingar um hvernig hann stendur í náminu. Áhersla er lögð á mætingu og ástundun.