Farið yfir öryggisbúnað, m.a. loftpúða og beltastrekkjara og þægindabúnað í ökutækjum sem jafnframt er staðalbúnaður. Búnaðurinn skoðaður í ökutækjum með tilvísun í upplýsingar framleiðenda. Áhersla á snyrtilega umgengni um ökutæki sem eru til viðgerðar og afleiðingar yfirsjónar viðgerðamanna á þeirra eigin öryggi í vinnu við öryggisbúnað, akstursöryggi og viðgerðakostnað. Sérstök áhersla er lögð á hættur af umgengni við öryggis- og verndarbúnað með sprengihleðslu, s.s. púða í stýri, mælaborði, hliðum farþegarýmis og öryggisbeltum. Áherslur í námsefni breytast eftir því hvort nemendahópurinn er bifvélavirkjar eða bifreiðasmiðir.
Nemandi skal hafa öðlast þekkingu og skilning á:
kröfum um öryggisbúnað í reglugerð um gerð og búnað ökutækja
hættum sem stafa af rangri umgengni um öryggisbúnað
virkni þægindabúnaðar í nýjum bifreiðum
Nemandi skal hafa öðlast leikni í að:
skoða og prófa öryggisbúnað
gera við öryggisbúnað innan þeirra marka sem framleiðendur ætla almennum viðgerðamönnum
Nemandi skal geta hagnýtt þá almennu þekkingu og leikni sem hann hefur aflað sér til að:
lýsa virkni eftirtalins búnaðar: þægindabúnaðar, höggvara, öryggisbelta, loftpúða, barnastóla, samlæsinga, rafknúinna rúðuvinda, þjófafæla, rafhitaðra rúða og útispegla, rafstilltra útispegla, mæla og gaumljósa, mælaborðslýsingar, innilýsingar, ræsihindrunar í sjálfskiptingu og annarra ræsihindrana
Verklegt mat; nemandinn nefnir, bendir á og lýsir gerð og hlutverki öryggiskerfa og einstakra íhluta þeirra. Hann lýsir hvernig standa skuli að verki við að skoða, prófa og skipta um ýmsan öryggisbúnað í ökutækjum. Nemandinn sýnir að hann geti ráðlagt öðrum viðgerðamönnum um rétt vinnubrögð og umgengni um öryggisbúnað í ökutækjum. Skriflegt mat; nemandinn gerir verkefni úr viðfangsefni áfangans.