Áfanginn er ætlaður til að efla og styrkja félagsfærni nemenda. Félagsfærni er félagslega viðurkennd lærð hegðun sem gerir manneskjunni kleift að eiga árangursrík samskipti við aðra og að forðast félagslega óásættanleg viðbrögð. Nemendur stinga sjálfir upp á málefnum sem þeim finnst nauðsynlegt að taka fyrir í hverjum tíma. Þannig eru þeir gerðir virkir þátttakendur í mikilvægum ákvarðanatökum og skoðanaskiptum. Tímarnir eru hóptímar og gera nemendur verkefni og nota m.a. leikræna tjáningu til að æfa sig í félagsfærni.
Nemandi skal hafa öðlast þekkingu og skilning á:
félagslegri hegðun eins og kostur er
óskrifuðum reglum í félagslegum samskiptum
eigin ábyrgð í samskiptum við annað fólk
styrkleikum sínum og hæfileikum
eigin tilfinningum og annarra í samskiptum
eigin sjálfsmynd
jákvæðum samskiptum
Nemandi skal hafa öðlast leikni í að:
tjá sig munnlega
hlusta á aðra
tengjast félögum
vinna með öðrum
greina í sundur tilfinningar og hafa stjórn á þeim
haga sér vel við ýmis tækifæri sem krefjast félagslegrar innsýnar
setja sig í spor annarra
greina eigin ábyrgð og skyldur
vinna með öðrum
Nemandi skal geta hagnýtt þá almennu þekkingu og leikni sem hann hefur aflað sér til að:
geta átt í jákvæðum og innihaldsríkum samskiptum við annað fólk
finna nýjar og viðeigandi aðferðir til að leysa vandamál
iðka háttvísi
bera virðingu fyrir sjálfum sér og öðrum
Símat sem byggir á áhuga og virkni nemanda við ýmis konar verkefnavinnu.