Framhaldsáfangi í afbrotafræði þar sem lögð er áhersla á að þjálfa nemendur í að beita gagnrýnni hugsun. Farið verður í viðfangsefni afbrotafræðinnar á ítarlegri hátt en í afbrotafræði I og ný viðfangsefni tekin fyrir eins og t.d. íslenskar rannsóknir í afbrotafræði, þróun refsinga, alþjóðlegur samanburður, greiningu afbrotatíðni eftir sveitarfélögum, birtingamynd afbrota í fjölmiðlum, rafræn afbrot, afbrot innan fjölskyldunnar, tengsl félagslegrar stöðu og afbrota og aðferðir til að draga úr afbrotatíðni. Farið verður á ítarlegri hátt í kenningar og rannsóknaraðferðir greinarinnar með það að markmiði að nemandinn verði fær um að lesa fræðin með gleraugum kenninga og verði gagnrýninn á vísindalegan og uppbyggjandi hátt. Þá er lögð áhersla á að nemandinn geti beitt kenningum og vísindalegri hugsun við greiningu á raunverulegum viðfangsefnum. Markmiðið er að auka skilning, túlkun, leikni og færni nemandans í að nota kenningar rannsóknarniðurstöður og rökhugsun með það að markmiði að geta lagt fram stefnumótandi tillögur.
FÉLA3AH05
Nemandi skal hafa öðlast þekkingu og skilning á:
þróun afbrotafræðinnar á Íslandi
tilgangi refsilaga
íslenskum rannsóknum í afbrotafræði
tengslum félagslegrar stöðu og afbrota
tengslum kenninga við raunveruleg viðfangsefni
hryðjuverkum og hryðjuverkahópum
ítrekunartíðni afbrota í alþjóðlegum samanburði
rafrænum afbrotum
aðferðum til að draga úr afbrotatíðni
Nemandi skal hafa öðlast leikni í að:
greina frá og skýra ólíka afbrotatíðni eftir samfélagsgerðum
greina frá og skýra ólíka afbrotatíðni í heiminum
skilgreina ítrekunartíðni afbrota og hlutverk fangelsiskerfisins
skýra rafræn afbrot sem hluta af nýrri samfélagsmynd
skýra aðferðir til að draga úr afbrotatíðni
nota kenningar til að fást við almenn viðfangsefni afbrotafræðinnar
lesa og greina rannsóknir afbrotafræðinga á gagnrýnin hátt
Nemandi skal geta hagnýtt þá almennu þekkingu og leikni sem hann hefur aflað sér til að:
nýta sér helstu aðferðir greinarinnar á ítarlegan hátt
nýta sér kenningar í stefnumótun
geta beitt gagnrýnni hugsun í fræðilegri umræðu
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá.