Grunnáfangi í kynjafræði þar sem teknar eru fyrir birtingarmyndir og staðalmyndir kynjanna í fortíð og nútíð með áherslu á að greina stöðu kynjanna eins og hún er í dag víðsvegar um heiminn. Fjallað er um mikilvægi jafnræðis meðal borgara í lýðræðisþjóðfélagi. Í því sambandi verður unnið sérstaklega að greiningu á þeim menningarlega og félagslega mun sem einkennt hefur stöðu kynjanna í samfélaginu í gegnum söguna til dagsins í dag. Fjallað er rækilega um stöðu kynjanna á ýmsum sviðum samfélagsins allt frá fjölskyldulífi til stjórnmála. Leitað verður svara við því af hverju staða kynjanna er ólík og hvort að þörf sé fyrir breytingar. Nemendur fá þjálfun í beitingu kynjagleraugna á hin margbreytilegu svið mannlífsins.
Félagsfræði/félagsvísindi á fyrsta þrepi.
Nemandi skal hafa öðlast þekkingu og skilning á:
helstu hugtökum jafnréttismála
birtingamyndum kynjaskekkju í nærsamfélaginu
birtingamyndum kynjaskekkju frá alþjóðlegu sjónarhorni
Nemandi skal hafa öðlast leikni í að:
taka þátt í umræðum um algeng álitamál sem tilheyra kynjafræðinni
greina stöðu og staðalmyndir kynjanna úr fjölbreyttum miðlum
Nemandi skal geta hagnýtt þá almennu þekkingu og leikni sem hann hefur aflað sér til að:
skoða umhverfi sitt með gleraugum kynjafræðinnar
setja sig í spor annarra
bera virðingu fyrir ólíkum skoðunum
Í áfanganum er gert ráð fyrir leiðsagnarmati sem felst í því að nemandinn fái með skipulegum og reglulegum hætti upplýsingar frá kennara um hvernig hann stendur í náminu. Meðal námsmatsþátta eru ýmiss konar einstaklings og hópaverkefni.