Áfanginn veitir grunnþekkingu á verkfærum leikarans í persónusköpun, greiningu leikverka og uppbyggingu á senum. Nemendur hljóta þjálfun í verklagi og verkferlum leikhússins og byggð er upp leikni í sjálfsaga og samskiptum. Áhersla er lögð á að nemendur læri að beita sköpunargleði til jafns við formuppbyggingu sena og persóna. Áfanginn er unninn í samvinnu við Menningarfélag Akureyrar. Nemendur fara reglulega í heimsóknir á æfingar hjá Leikfélagi Akureyrar, ræða við fagfólk og fá innsýn í uppbyggingu leiksýningar.
Nemandi skal hafa öðlast þekkingu og skilning á:
mikilvægi þess að nýta sér jákvæðni í samvinnu við aðra
verkfærum leikarans (rödd, líkama, tilfinningum og ímyndunarafli)
uppbyggingu leikrita
verkfærum og verkferlum leikhússins
spuna og uppbyggingu sena og persóna
mikilvægi góðrar samskiptahæfni og aga
Nemandi skal hafa öðlast leikni í að:
nýta verkfæri leikarans í framkomu almennt
nýta aga og sköpunargleði sína saman
vinna uppbyggilega með öðrum
beita gagnrýninni hugsun í áhorfi sínu á leiklist sem og á eigin vinnu
einbeita sér í hugmyndavinnu og allri vinnu sem fer fram á leiksviði
beita sjálfstæðum vinnubrögðum
Nemandi skal geta hagnýtt þá almennu þekkingu og leikni sem hann hefur aflað sér til að:
greina spunasenur og persónur
rökræða leikhús, senur og persónur í leikverkum af ígrundun
skapa persónur og túlka tilfinningar og ætlan á sviði
beita hlustun og jákvæðri samvinnu á sviði og utan þess
beita sjálfsaga og sjálfstæðum vinnubrögðum
Námsmat er tilgreint í kennsluáætlun og samræmist skólanámskrá.