Nám í þessum áfanga á að veita nemendum almenna fræðslu um utanaðkomandi ógnir við lífríki sjávar, þau áhrif sem útgerð skipa hefur eða getur haft á umhverfisþætti og þær reglur sem settar hafa verið í þeim tilgangi að draga úr þeim áhrifum. Nemendur kynnast þeim þáttum sem stuðla að eða geta valdið mengun eða breytingum á umhverfisþáttum og þeim afleiðingum sem þær breytingar kunna að hafa á lífríki sjávar. Almennt skal fjallað um mengun lofthjúps og áhrif hennar á veðurfar og hafstrauma en einnig áhrif mengunar á líkríki sjávar, svo sem á örverumyndanir í fjörðum og flóum sem geta valdið súrefnisþurrð í sjó. Jafnframt er fjallað um þær hættur sem lífríki sjávar stafar af mengun frá skipum og þau lög og reglur sem þar um gilda um mengunarvarnir ásamt því að fjalla um einstök mengunaratvik, orsakir þeirra og viðbrögð.
Nemandi skal hafa öðlast þekkingu og skilning á:
helstu tegundum mengunar sjávar og uppruna þeirrar mengunar
ákvæðum alþjóðasamþykktar til að koma í veg fyrir mengun sjávar, MARPOL
einstökum köflum MARPOL samþykktarinnar, gildissviði þeirra og efni
ákvæðum íslenskra laga um varnir gegna mengun hafs og stranda
reglum um olíumengun frá skipum og þeim ráðstöfunum sem gera skal til að koma í veg fyrir mengun
takmörkunum á notkun tiltekinna eldsneytistegunda við siglingu skipa á tilteknum hafsvæðum
reglum um tilkynningar til stjórnvalda, íslenskra sem erlendra, við mengunarslys eða óhapp
notkun ósoneyðandi efna, þeim reglum sem gilda um slík efni og hvernig skuli með þau fara
alþjóðareglum um sjókjölfestuskipti í hafi, um gildissvið og um farmkvæmd þeirra ákvæða
efnum sem notuð eru í skipum og geta verið hættuleg séu þau ekki notuð með réttum hætti
viðbragðsáætlunum við mengunaróhöppum, SOPEP, og efni þeirra
Nemandi skal hafa öðlast leikni í að:
fylgja þeim reglum sem gilda um mengandi efni frá skipum
gera viðeigandi ráðstafanir vegna förgunar efna og til að koma í veg fyrir mengun
Nemandi skal geta hagnýtt þá almennu þekkingu og leikni sem hann hefur aflað sér til að:
stjórna skipi og vinnslu með lágmarks mengun fyrir umhverfið
halda olíudagbók
halda sorpdagbók
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.