Áfanginn er erlent samstarfsverkefni sem leggur áherslu á andlega vellíðan, tjáningu og gagnrýna hugsun nemenda í stafrænum heimi. Verkefnið tengir saman menningu, listir, útivist og skrif sem leið til að efla andlega vellíðan á skapandi og fjölbreyttan hátt.
Engar formlegar forkröfur eru til þátttöku en áhugi á skapandi vinnu, samvinnu og menningartengdu starfi er æskilegur.
Nemandi skal hafa öðlast þekkingu og skilning á:
mikilvægi andlegrar vellíðunar í námi og daglegu lífi
hlutverki lista, menningar og skapandi tjáningar
tjáningu og gagnrýnni hugsun í fjölmenningarlegu samhengi
lausnum til að bæta andlega heilsu og vellíðan
mismunandi menningarheimum
Nemandi skal hafa öðlast leikni í að:
nota ritun sem tjáningarform og verkfæri til að vinna með tilfinningar
vinna á skapandi hátt með menningarlegar og listrænar aðferðir
taka þátt í samvinnuverkefnum þvert á landamæri og menningarheima
nýta náttúruna og útivist sem leið til að bæta andlega vellíðan
ræða og rökstyðja mikilvægi andlegrar heilsu og gagnrýninnar hugsunar í samtímanum
Nemandi skal geta hagnýtt þá almennu þekkingu og leikni sem hann hefur aflað sér til að:
stuðla að eigin vellíðan og annarra á skapandi hátt
tengja menningu, listir og sjálfstjáningu við geðheilbrigði
taka virkan þátt í fjölmenningarlegri samvinnu og sýna skilning á ólíkum menningarlegum sjónarhornum
sýna ábyrgð í eigin umgengni við menningararf og listræna sköpun
taka þátt í nýsköpun sem leiðir til aukinnar vellíðanar í samfélaginu
Í áfanganum er viðhaft símat alla önnina. Öll verkefni gilda til einkunnar og því er mikilvægt að nemendur stundi námið reglulega.