Í áfanganum er viðfangsefnið kynjafræði sem er þverfagleg fræðigrein sem á rætur sínar í félagsfræði og stjórnmálafræði. Kynjafræðin verður kynnt sem fræðileg og hagnýt umræða um mannlegan veruleika út frá grundvallarbreytunni; kyn. Farið verður í sögu jafnréttisbaráttu kvenna, rauðsokkur, femínisma, getnaðarvarnir, fóstureyðingar, kynlíf og mótun kynverundar. Auk þess verður fjallað um móðurhlutverkið, föðurhlutverkið, klámvæðingu, og birtingarmynd kynjanna í fjölmiðlum, stjórnkerfi og hversdagslífi.
Megináhersla verður á að tengja kynjafræðina á hagnýtan hátt við aðrar greinar og daglegt líf nemenda og hjálpa þeim að nota ‚kynjagleraugun‘ (sjónarhorn kynjafræðinnar) á fjölmiðla, heilbrigðiskerfi, skólagöngu, vinnumarkað og frávikshegðun s.s. vændi, ofbeldi og afbrot.
LÍFS1BE05, LÍFS1BS05 og annað hvort FÉLV1ÞF05 eða HEIM2SI05
Nemandi skal hafa öðlast þekkingu og skilning á:
helstu hugtökum og kenningum kynjafræðinnar; s.s. líffræðilegri nauðhyggju, mótunarhyggju, kyngerfi, staðalmyndum, klámvæðingu, jafnrétti, mismunun, femínisma, karl og kvenrembu, feðraveldi og kynhlutverkum
helstu fræðimönnum í sögu jafnréttis- og kynjafræði, erlendum og innlendum
sögu jafnréttisbaráttunnar; þrjár bylgjur og áfangar
stöðu karla og kvenna í íslensku samfélagi, fyrr og nú
Nemandi skal hafa öðlast leikni í að:
taka þátt í umræðum um algeng álitamál sem tilheyra kynjafræðinni og geti mótað sér afstöðu og gert grein fyrir henni með tilliti til kenninga kynjafræðinnar og hugtaka
beita femínísku viðhorfi (kynjagleraugum) ; t.d. greina staðalmyndir, nauðhyggju og rökskekkjur í fréttaflutningi og annarri orðræðu
Nemandi skal geta hagnýtt þá almennu þekkingu og leikni sem hann hefur aflað sér til að:
líta á samfélagið út frá sjónarhorni kyns og kynferðis með gagnrýnum augum og geti tengt hugmyndir kynjafræðinnar við eigin veruleika
Námsmat er útfært í kennsluáætlun í samræmi við skólanámskrá.