Í áfanganum er saga Austurlands tekin til sérstakrar skoðunar. Farið er yfir helstu einkenni sögulegrar þróunar í landshlutanum og síðan valdir nokkrir þættir og um þá fjallað sérstaklega. Lögð er áhersla á að tengja umfjöllunarefnin umhverfi nemenda með námsferðum á sögustaði. Farið er í safnaheimsóknir og rannsóknum á sviði sagnfræði og fornleifafræði sem snerta Austurland gerð
sérstök skil. Í áfanganum er gert ráð fyrir heimsóknum gestafyrirlesara, sem fjalla um afmörkuð efni.
Áfanganum er ætlað að vera inngangur að sagnfræði og því lögð áhersla á að nemandinn skrifi stóra ritgerð. Lögð er áhersla á öflun gagna með fjölbreyttum hætti meðal annars með viðtölum.
Í áfanganum er leitast við að vera í sambandi við samfélagið og það helsta sem er að gerast í þeim efnum sem tengjast viðfangsefni áfangans, meðal annrs möguleika á menningartengdri ferðaþjónustu. Þá má nefna samstarf við söfn á Austurlandi og verkefni sem þar geta boðist.
Leitast er við að gera verkefni nemenda sýnileg og má þar nefna að nokkur verkefni nemenda hafa verið gefin út í tímaritum þeim sem fjalla um málefni Austurlands.
SAGA2ÁN05
Nemandi skal hafa öðlast þekkingu og skilning á:
megin þáttum í sögu Austurlands
afmörkuðum viðfangsefnum tengdum sögu fjórðungsins að eign vali
mótun austfirsks samfélags
heimildum um sögu Austurlands
fjölbreyttum aðferðum við miðlun sögunnar
Nemandi skal hafa öðlast leikni í að:
nota söfn og þær heimildir sem þar finnast til að tileinka sér nærsögu sína
taka viðtöl til gagnaöflunar
tileinka sér sagnfræðilegt efni í íslenskum fræðiritum
meta gildi og árieiðanleika heimilda
vinna út heimildum og koma þeim á framfæri á viðurkenndan hátt
Nemandi skal geta hagnýtt þá almennu þekkingu og leikni sem hann hefur aflað sér til að:
leggja sitt af mörkum fjórðungnum til framdráttar
hafa öðlast sjálfstraust og sjálfstæði í þróun hugmynda og sýni áræðni og innsæi við útfærslu þeirra og túlkun
greina hverskonar heimildir eru til staðar og hvernig hægt sé að nýta þær
setja sjálfan sig í samhengi sögunnar sem þátttakanda og skoðanda, og verða hæfur til að fjalla um málefni fjórðungsins
vinna heilstætt verkefni samkvæmt reglum um gerð heimildaverkefna
Námsmat er útfært í kennsluáætlun í samræmi við skólanámskrá.