Alhliða þjálfun í teiknifærni. Nemendur þjálfa hæfileikann til að umbreyta þrívíðu formi í tvívíða teikningu og nota ýmsar hjálparaðferðir til þess að efla sjónskilning og sjónminni. Teikning fjölbreyttra manngerðra hluta, náttúruforma og umhverfis. Áhersla lögð á fríhendisteikningu. Mælingar og hlutföll, stefnur og staðsetning hluta í rými. Unnið með gagnsæishugsun og formgreiningu, mótun og efnisáferð með blæbrigðaríkri skyggingu. Mannslíkaminn er teiknaður, beinagrindin könnuð og teiknað eftir lifandi módeli. Teiknað er eftir lifandi fyrirmynd, beinagrind og ljósmyndum, með m.a. viðarkolum, blýanti, bleki og málningu. Nemendur ígrunda verk sín í samvinnu við kennara og aðra nemendur. Nemendur vinna svo á sjálfstæðan hátt að fullunnu lokaverki þar sem þeir hagnýta þá þekkingu sem þeir hafa aflað sér. Áfanginn miðar einnig að því að opna fyrir sköpunarkraft nemenda og gera þá óhrædda við að prófa, framkvæma og þróa hugmyndir sínar án þess að hræðast útkomuna.
Inngangur að listum
Nemandi skal hafa öðlast þekkingu og skilning á:
grunnþáttum teikningar
sjónskilning og sjónminni
sjálfstæðum vinnubrögðum
vinnuumhverfi,vinnutækjum og áhöldum teikningar
notkun blýanta og kola
grunnþáttum formgreiningar og teikningar
mismunandi nálgun listamanna við teikningu
beinabyggingu mannslíkamans
mikilvægi aga, metnaðar, ábyrgðar og jákvæðni í vinnubrögðum
Nemandi skal hafa öðlast leikni í að:
skapandi hugsun
skissu og teiknivinnu
fríhendisteikningu
að framkalla þrívídd með skyggingu
myndbyggingu og uppbyggingu myndflatar
mælingum, hlutföllum, stefnum og staðsetningu hluta í rými
að efla skilning sinn á teikningu, að upplifa, skynja og túlka það sem hann sér, upplifir
að beita mismunandi miðlunarleiðum í listsköpun sinni
skilningi á formum og uppbyggingu þeirra
að skiptast á skoðunum og setja fram hugmyndir sínar
að bregðast við viðmælendum
Nemandi skal geta hagnýtt þá almennu þekkingu og leikni sem hann hefur aflað sér til að:
teikna fríhendis
nýta reglur, form og lögmál teikningar í eigin listsköpun
teikna lifandi módel
vinna á persónulegan hátt með eigin hugmynd og útfæra hana í myndverki með tilliti til formgreiningar og blæbrigðaríkrar skyggingar
fullvinna lokaverk undir leiðsögn kennara
að skapa verk byggð á eigin listrænum styrk undir leiðsögn kennara
skilgreina eigin verk
standa að sýningu þar sem nemandinn miðlar listrænum styrk sínum
kynna eigin verk og geta brugðist við og tjáð skoðanir sínar um verk annara
þróa með sér aga, metnað, ábyrgð og jákvæðni í vinnubrögðum
meta eigið vinnuframlag
Í áfanganum er viðhaft símat alla önnina og lögð er áhersla á vinnusemi, sköpun og áræði.
Öll verkefni gilda til einkunnar og þess vegna er það mikilvægt að nemendur stundi námið reglulega.