Í áfanganum verður fléttað saman hreyfingu og fræðslu um áhrif lífsstíls á heilsu og leitast við að hvetja nemendur til heilbrigðari lífshátta. Lögð verður áhersla á fjölbreytta líkamsþjálfun í formi þol-, styrktar- og liðleikaþjálfunar í þeim tilgangi að nemendur finni hreyfingu við sitt hæfi. Nemendur fræðast um næringu, svefn, hreyfingu, tóbak og vímuefni og hvernig þessir lífsstílsþættir geta haft áhrif á eigin heilsu. Auk þess verður boðið upp á mælingar s.s. þol- og styrktarmælingar, blóðþrýstings-, ummáls- og fitumælingar.
Engar
Nemandi skal hafa öðlast þekkingu og skilning á:
Hvernig ýmsir lífsstílsþættir s.s. mataræði, hreyfing, hreinlæti, svefn og streita hafa áhrif á heilsu okkar.
Mikilvægi úthalds-, styrktar-, og liðleikaþjálfunar.
Mikilvægi hreyfingar fyrir mismunandi hópa fólks og ráðleggingar um hreyfingu.
Skaðsemi tóbaks, áfengis og annarra fíkniefna
Helstu leiðum í forvarnarstarfi gegn vímuefnum.
Nemandi skal hafa öðlast leikni í að:
Auka úthald sitt, styrk og liðleika með fjölbreyttum aðferðum.
Stunda slökunaræfingar.
Útbúa heilsudagbók.
Beita forvörnum í nærumhverfi sínu.
Leita sér upplýsinga sem varða heilsusamlegan lífsstíl.
Nemandi skal geta hagnýtt þá almennu þekkingu og leikni sem hann hefur aflað sér til að:
Stunda heilsusamlegan lífsstíl og setja sér einföld og skýr markmið varðandi heilsueflingu metið með heilsudagbók og kynningarverkefnum.
Styrkja jákvæða sjálfsmynd og þátttöku í almennri heilsurækt, leikjum og útiveru sem metið er með þátttöku nemenda og umræðum.
Viðhalda líkamshreysti sem metið er með því að nemendur leysa af hendi verkefni, æfingar og stunda leiki.
Nýta sér möguleika í að flétta hreyfingu í daglegt líf og starf sem metið er með heilsudagbók og áætlanagerð nemenda.
Taka þátt í umræðum og miðla fróðleik um hættur er fylgja ávana- og fíkniefnum sem metið er með umræðum, rökræðum og jafningjamati.
Nýta sér upplýsingatækni í sambandi við heilsurækt, næringu og lífsstíl sem metið er með umræðum og netverkefnum.
Þetta er bæði verklegur og bóklegur áfangi og er námsmat að mestu á formi mismunandi verkefna. Verklegar æfingar (hreyfing), verkefni, hópverkefni, umræðuverkefni og ávallt er lögð áhersla á tengingu við daglegt líf nemenda. Ekki verður lokapróf í áfanganum og stuðst er við leiðsagnarmat.