Starfsþjálfun sjúkraliðanema er áfangi með námslokum á 3. þrepi og er 27 feiningar. Áfanginn er reynslutími fyrir sjúkraliðanema á heilbrigðisstofnun og stendur yfir í 16 vikur (80 vaktir). Á tímabilinu öðlast nemandinn hæfni og sjálfstæði í störfum sjúkraliða undir handleiðslu reyndra sjúkraliða og hjúkrunarfræðinga. Við lok námsins í áfanganum skal nemandi búa yfir almennri og sérhæfðri þekkingu, leikni og hæfni til þess að vinna hjúkrunar- og umönnunarstörf á faglegan hátt. Heimilt er að skipta starfsþjálfun niður í tvö til þrjú tímabil, en þjálfunin skal þó vera samfelld á hverju tímabili og lágmarksvinnuhlutfall ekki fara undir 60%. Nemandi skal áður en hann fer í starfsþjálfun fá samþykki skóla fyrir námsstaðnum og skrifa undir námssamning ásamt fulltrúa skóla og ábyrgðaraðila á námsstað. Að loknu námi í VINN2LS08 er nema heimilt að ljúka fimm vikum af starfsþjálfuninni. Nemandi skal alfarið fylgja þeim reglum sem viðkomandi heilbrigðisstofnun setur sínu starfsfólki.
VINN2LS08, VINN3ÖH08,VINN3GH08, sjá ennfremur í lýsingu.
Nemandi skal hafa öðlast þekkingu og skilning á:
faglegum grunni hjúkrunarstarfa
mikilvægi samskipta og samvinnu í störfum sjúkraliða
vinnuumhverfi og starfssviði sjúkraliða
siðareglum sjúkraliða
lögum og reglugerðum sem tengjast störfum sjúkraliða.
Nemandi skal hafa öðlast leikni í að:
beita faglegum vinnubrögðum í sjúkraliðastarfinu
nýta samskiptahæfni við margvíslegar aðstæður
taka þátt í þverfaglegu samstarfi
starfa eftir siðareglum, sýna siðferðisvitund, fordómaleysi, umburðarlyndi og víðsýni í störfum sínum
vinna eftir gæðaviðmiðum heilbrigðisstofnana.
Nemandi skal geta hagnýtt þá almennu þekkingu og leikni sem hann hefur aflað sér til að:
yfirfæra og samþætta fræðilega þekkingu að sjúkraliðastarfinu
beita innsæi, gagnrýnni og skapandi hugsun við lausn hjúkrunarviðfangsefna
vera fær um að vinna sjálfstætt og bregðast við margvíslegum aðstæðum í sjúkraliðastarfinu
beita, rökstyðja og ígrunda þær hjúkrunarmeðferðir sem hann framkvæmir samkvæmt hjúkrunaráætlun hverju sinni
sýna hæfni í samskiptum við ólíka einstaklinga með ólíkar þarfir
tileinka sér nýjungar og þróa sig í starfi.
Leiðsagnarmat þar sem vinna nemanda í áfanganum er metin með reglubundnum hætti og hjúkrunardeildarstjóri viðkomandi deildar/heilbrigðisstofnunar gefur lokamat í lok starfsþjálfunartímabils.