Viðfangsefni áfangans eru íslenskar fornbókmenntir frá upphafi til siðskipta. Lesin er ein veigamikil Íslendingasaga og valin dæmi annarra fornbókmennta í lausu máli. Lesin eru nokkur eddukvæði í heild. Einnig eru lesin dæmi um annan fornan kveðskap. Lögð er áhersla á að setja verkin í menningarsögulegt samhengi sem og að fjalla um gildi þeirra fyrir nútímafólk. Einnig eru lesnar og greindar nútímabókmenntir sem tengjast fornbókmenntunum sem lesnar eru. Nemendur fá þjálfun í að lesa fræðilegt efni og gera skipulega grein fyrir því. Nemendur fá þjálfun í að setja fram skoðanir sínar á fornbókmenntum og gildi þeirra á gagnrýninn og skapandi hátt, bæði munnlega og skriflega.
Nemandi þarf að hafa náð fullri hæfni í íslensku á 2. þrepi.
Nemandi skal hafa öðlast þekkingu og skilning á:
Formlegum og efnislegum einkennum eddukvæða.
Formlegum og efnislegum einkennum Íslendingasagna og geta áttað sig á bókmenntasögulegu gildi þeirra.
Öðrum fornbókmenntum, bæði í lausu máli og bundnu.
Uppbyggingu samfélags fornbókmenntanna; stéttaskiptingu og stöðu kynjanna.
Rannsóknum á fornbókmenntum.
Nemandi skal hafa öðlast leikni í að:
Gera skipulega grein fyrir rannsóknum á fornbókmenntum.
Miðla til annarra á gagnrýninn og skapandi hátt, bæði skriflega og munnlega, aðalatriðum lesinna texta.
Átta sig á ólíkum stíleinkennum fornbókmennta.
Fjalla um uppbyggingu samfélags fornbókmenntanna; stéttaskiptingu og stöðu kynjanna.
Nemandi skal geta hagnýtt þá almennu þekkingu og leikni sem hann hefur aflað sér til að:
Setja ólíka texta frá miðöldum í sögulegt samhengi og geta lagt sjálfstætt mat á gildi þeirra í samtímanum.
Gera grein fyrir munnlegri geymd fornbókmennta og ritunartíma þeirra.
Átta sig á gildi fornbókmennta fyrir Íslendinga sem þjóð.
Miðla til annarra hugmyndum sínum um gildi textanna fyrir nútímafólk.
Átta sig á mikilvægi íslenskra fornbókmennta fyrir önnur Norðurlönd.
Skrifa texta í anda fornbókmennta.
Bera saman á gagnrýninn hátt samfélagsmynd fornbókmennta og nútímann með tilliti til valdabaráttu og stöðu kynjanna.
Námsmat byggir á lokaprófi og fjölbreyttum verkefnum sem unnin eru jafnt og þétt yfir önnina.