Fjallað er um sögu félagsfræðinnar, helstu frumkvöðla og kenningar. Einnig um grunneiningar samfélagsins (s.s. fjölskyldan, stjórnkerfið, efnahagskerfið og trúarbrögðin) og þær skoðaðar frá sjónarhorni félagsfræðinnar. Lögð er áhersla á að nemendur öðlist skilning á því hvernig samfélagið mótar manninn og maðurinn samfélagið. Nemendur fá þjálfun í að afla, greina og meta á gagnrýninn hátt upplýsingar um samfélagið. Helstu viðfangsefnin eru kynning á félagsfræðinni sem fræðigrein, rannsóknaraðferðum og grundvallarhugtökum hennar. Lögð er áhersla á að nemendur öðlist þekkingu á umhverfi sínu og sjálfbærni þess svo að þeir verði færir um að taka virkan þátt í samfélagslegum umræðum og mynda sér skoðanir á meðvitaðan og gagnrýninn hátt. Nemendur kynna sér félagslega þætti sem stýra hegðun og athöfnum einstaklingsins og keppt er að því að nemendur öðlist skilning á skipulagi eigin samfélags og annarra. Meginmarkmið áfangans er að nemendur átti sig á því hvernig samfélagið hefur áhrif á þá og hvernig þeir geta haft áhrif á samfélagið.
Nemandi skal hafa öðlast þekkingu og skilning á:
þróun félagsfræðinnar sem vísindagreinar, helstu upphafsmönnum hennar, grundvallarkenningum og helstu rannsóknaraðferðum
félagslegu umhverfi sínu með því að skýra tengsl einstaklings og samfélags með beitingu félagsfræðilegra hugtaka eða kenninga
að nemandinn kynnist og geti beitt ýmsum grundvallarhugtökum félagsvísinda á íslenskt þjóðfélag.
menningarlegri margbreytni.
Nemandi skal hafa öðlast leikni í að:
beita ýmsum grundvallarhugtökum félagsvísinda á íslenskt þjóðfélag
skilja grunnþætti íslensks þjóðfélags
skilja hvernig samfélagið hefur áhrif á hann og hvernig hann getur haft áhrif á samfélagið
Nemandi skal geta hagnýtt þá almennu þekkingu og leikni sem hann hefur aflað sér til að:
greina og meta upplýsingar um samfélagið svo að þeir geti tekið gagnrýna afstöðu til viðburða á hverjum tíma
beita sjálfstæðum vinnubrögðum með því að afla sér heimilda og koma þekkingu sinni á framfæri bæði í ræðu og riti