Fjallað er um frumkvöðla félagsfræðinnar og gerð grein fyrir helstu kenningum félagsfræðinnar í tengslum við þekktar rannsóknir. Þá er skoðað hvernig ólíkar félagsfræðikenningar líta á frávik, kynferði, kynþætti, samskipti og stétt.
Nemendur fá þjálfun í að beita félagsfræðilegu innsæi á tiltekið viðfangsefni. Meginmarkmið áfangans er að nemendur öðlist dýpri skilning á félagsfræðilegum hugtökum og kenningum og geti beitt þeim við túlkun og greiningu á samfélaginu.
Einnig að þeir verði færir um að taka afstöðu til og fjalla á gagnrýninn hátt um texta sem fjallar um helstu viðfangsefni félagsfræðinnar. Í verkefnavinnu eiga nemendur að glíma bæði við megindlega- og eigindlega rannsóknarhefð. Ætlast er til þess að nemendur sýni frumkvæði og frumleika í þessari rannsóknarvinnu.
FÉLA2AA05
Nemandi skal hafa öðlast þekkingu og skilning á:
helstu hugtökum félagsfræðinnar.
framlagi helstu frumkvöðla félagsfræðinnar til greinarinnar.
helstu kenningum félagsfræðinnar.
helstu rannsóknarhefðum félagsfræðinnar.
helstu rannsóknarsviðum félagsfræðinnar.
helstu álitamálum innan félagsfræðinnar.
Nemandi skal hafa öðlast leikni í að:
beita hugtökum félagsfræðinnar á viðfangsefni daglegs lífs.
beita félagsfræðikenningum við túlkun og greiningu á samfélaginu, bæði almennt og á tiltekin viðfangsefni.
skilja stöðu sína og annarra innan samfélagsins.
beita rannsóknaraðferðum innan MR- og ER hefðarinnar á tiltekin viðfangsefni.
beita sjálfstæðum vinnubrögðum við að afla sér heimilda úti í samfélaginu.
Nemandi skal geta hagnýtt þá almennu þekkingu og leikni sem hann hefur aflað sér til að:
leggja mat á félagsfræðirannsóknir.
beita sýn félagsfræðinnar á tiltekið félagslegt fyrirbæri.
afla sér traustra upplýsinga, greina helstu atriði þeirra og hagnýta í verkefnavinnu.
tjá sig á skipulegan hátt, geta rökstutt og tekið gagnrýna afstöðu til samfélagslegra álitamála.