Áfanginn er fyrsti áfangi í íslensku. Í áfanganum er lögð mikil áhersla á lestur. Nemendur lesa fjölbreytta texta og fjalla um þá, bæði bókmenntir og annars konar texta. Lögð er áhersla á fjölbreytt læsi, ekki síst að lesa á gagnrýnan hátt. Kennd eru helstu hugtök sem notuð eru við að greina ljóð og laust mál og nemendur þjálfaðir í að beita þeim. Fjallað er um byggingu ritsmíða og röksemdafærslu. Lögð er áhersla á að ritun er ferli og nemendum er kennt að skrifa í skrefum. Nemendur eru þjálfaðir í að skrifa margs konar texta, bæði hlutlæga og huglæga, kenndur frágangur ritaðs máls og notkun hjálpargagna svo sem handbóka, orðabóka og leiðréttingarforrita. Grundvallaratriði málfræði eru rifjuð upp og notuð í umfjöllun um íslenskt mál, bæði lesna texta og frumsamda. Nemendur eru þjálfaðir í upplestri á eigin textum og annarra ásamt flutningi annars konar munnlegra verkefna. Nemendur eru þjálfaðir í stafsetningu og ætlast er til að þeir geti stafsett rétt með því að nota stafsetningarorðabók og leiðréttingarforrit.
Nemandi skal hafa öðlast þekkingu og skilning á:
Helstu hugtökum við ritgerðasmíð.
Helstu hugtökum sem notuð eru við að greina ljóð og laust mál.
Helstu einkennum bundins máls.
Nemandi skal hafa öðlast leikni í að:
Nýta helstu hugtök við ritgerðasmíð.
Nýta sér hugtök málfræði í umfjöllun um íslenskt mál, bæði lesna texta og frumsamda.
Nýta sér hjálpargögn, svo sem handbækur, orðabækur og leiðréttingarforrit, til að ganga frá rituðu máli.
Geta lesið upp eigin texta og annarra á skýran hátt.
Nýta helstu hugtök við að greina ljóð og laust mál.
Nemandi skal geta hagnýtt þá almennu þekkingu og leikni sem hann hefur aflað sér til að:
Skrifa læsilega texta af ýmsu tagi.
Skrifa bókmenntaritgerð og nýta sér þar hugtök textagreiningar.
Geta greint á milli ólíkra málsniða og nota viðeigandi málsnið.
Geta túlkað ljóð og laust mál og nýtt sér viðeigandi hugtök.
Námsmat byggir á fjölbreyttri verkefnavinnu í ræðu og riti, auk lokaprófs.
Notaðar eru margs konar matsaðferðir, til dæmis jafningjamat og sjálfsmat.