Heimur óperunnar er samþættur áfangi úr sögu og heimspeki og getur gilt sem annað hvort. Markmið áfangans er að opna heim óperunnar og kynnast baksviðinu, fara í Íslensku óperuna og á óperubíó, beina útsendingu frá Metropolitan óperunni í New York eða Royal Opera House í London, auk þess að skoða sögulegan efnivið þeirra tveggja til þriggja ópera sem til umfjöllunar eru hverju sinni og pæla í hinum djúpstæðu vandamálum mannlegrar tilveru sem liggja óperum til grundvallar. Mikil vinna fer fram í gegnum hlustunarverkefni auk þess sem nemendur vinna skapandi verkefni.
Nemandi skal hafa öðlast þekkingu og skilning á:
sögu óperunnar
óperuforminu og helstu óperutónskáldum og librettistum
nokkrum frægum óperum, aríum, dúettum, kórum og hljómsveitarköflum
Nemandi skal hafa öðlast leikni í að:
hlusta á óperur
bera saman flutning
velta fyrir sér spurningum um eðli tónlistar
velta fyrir sér spurningum um gildi tónlistar
Nemandi skal geta hagnýtt þá almennu þekkingu og leikni sem hann hefur aflað sér til að:
afla upplýsinga um sögulegt baksvið tónskálda og librettista
afla upplýsinga um söguna innan óperunnar og setja hana í samhengi
greina heimspekileg vandamál sem liggja óperum til grundvallar og fjalla um þau
taka eftir ólíkri túlkun og flutningi
Námsmat byggir á mætingu, ástundun, hlustunarverkefnum og frjálsu verkefni.