Í þessum byrjunaráfanga er fjallað um bókhaldshringrásina og helstu reglur tvíhliða bókhalds. Fjallað er um grundvallarhugtökin eignir, skuldir, gjöld og tekjur. Lögð er áhersla á að nemendur verði færir um að annast almennar færslur í dagbók, hafi skilning á uppgjöri og geti sett fram efnahags- og rekstrarreikning. Nemendum er veitt innsýn í notkun flestra reikninga sem telja má til grunnreikninga í fjárhagsbókhaldi. Nemendum er gerð grein fyrir tilgangi bókhalds og kynnt helstu lög um bókhald og virðisaukaskatt.
Nemandi skal hafa öðlast þekkingu og skilning á:
• grunnatriðum bókhalds svo sem eignum, skuldum, gjöldum og tekjum
• bókhaldshringrásinni og færslum í dagbók og aðalbók
Nemandi skal hafa öðlast leikni í að:
• færa einfaldar dagbókarfærslur og gera prófjöfnuð
• útbúa rekstrar- og efnahagsreikning í aðalbók
• reikna vexti, virðisaukaskatt, laun, söluhagnað/tap, og gera leiðréttingarfærslur
Nemandi skal geta hagnýtt þá almennu þekkingu og leikni sem hann hefur aflað sér til að:
• færa einfalt bókhald
• túlka niðurstöður úr rekstrar- og efnahagsreikningi
Námsmat felst annars vegar í skriflegu prófi sem byggir á markmiðum áfangans og hins vegar símmati sem meðal annars getur falist í skyndiprófum, verkefnum, mati á ástundun og virkni.