Í áfanganum er megináhersla lögð á að nemendur fái tilfinningu fyrir áhrifum hreyfingar á líðan sína, andlega og líkamlega. Farið er í gegnum æfingar sem þjálfa upp styrk, jafnvægi, stöðugleika og liðleika. Í jóga eru hreyfingar gerðar í takt við eigin öndunarflæði. Áhersla er lögð á að hver og einn geti tekið þátt í æfingunum á sínum forsendum. Í lok hvers tíma er farið í gegnum æfingar sem róa hugann og endað í slökun. Mikið er lagt upp úr líkamsvitund, einbeitingu og slökun hugans.
engar
Nemandi skal hafa öðlast þekkingu og skilning á:
mikilvægi flæðis öndunar í hreyfingum og stöðum
hvaða álagsstig hentar best til bætingar á líkamsástandi
æskilegum aðferðum til þjálfunar líkamans
mikilvægi slökunar
Nemandi skal hafa öðlast leikni í að:
einbeita sér að æfingum tímans og útiloka önnur verkefni sem bíða dagsins
fylgja eftir einföldum jógaæfingum í tíma út frá eigin getu
tengja saman öndun og hreyfingu í eðlilegt flæði
stunda líkams- og heilsurækt
stuðla að bættri líkamsbeitingu
Nemandi skal geta hagnýtt þá almennu þekkingu og leikni sem hann hefur aflað sér til að:
draga úr streitu við krefjandi aðstæður með öndunartækni
tileinka sér rétta æfingatækni og líkamsbeitingu við jógaþjálfun
stunda reglulega, fjölbreytta hreyfingu eftir áhuga
stunda líkamsrækt í nánasta umhverfi og úti í náttúrunni
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.