Innræn og útræn öfl með sérstakri áherslu á jarðfræði Íslands. Flekakenningin og komið inn á þau gögn sem styðja hana. Flekarek og heitir reitir, jarðskjálftar og brotalínur, landmótun jökla og vatnsfalla. Farið er í mismunandi gerðir eldvirkni, mismunandi kvikugerðir og storkubergsmyndanir. Eðli og uppruni mismunandi steinda er skýrður þar sem sérstaklega er fjallað um þær frumsteindir og holufyllingar sem helst finnast í íslensku storkubergi. Fjallað er um mismunandi gerðir kviku, bergraðirnar þrjár, djúpbergsmyndanir, mismunandi hraungerðir, flokkun bergs, eldstöðvakerfi, helstu gerðir eldgosa, móbergsmyndanir, dyngjur, jarðvarmasvæði og jarðvarmaleit. Unnið er með jarðfræðikort og þætti í staðfræði Íslands sem viðkoma jarðfræði. Fjallað er um jökla, ár og vötn ásamt útrænum öflum almennt og komið inn á jarðsögu Íslands. Nemandi vinnur sjálfstætt og í hópum að lausn verkefna. Áhersla er lögð á tengingu við umhverfi og reynsluheim nemenda.
Nemandi skal hafa öðlast þekkingu og skilning á:
kenningum um landrek, botnrek og flekarek og mismunandi áhrifum eftir gerð flekamarka
því helsta sem notað er til að spá fyrir um stóra jarðskjálfta
mismuninum á frumstæðri og þróaðri kviku
hvernig yfirfæra megi þekkinguna um bergraðirnar þrjár út fyrir gosbeltin
hvaða þættir hafa áhrif á kvikugerðir og hegðun eldgosa
helstu einkenni eldstöðvarkerfa
helstu djúpbergsmyndunum og þekkja nokkur dæmi
myndun móbergsfjalla ásamt dyngjumyndun
hvernig ytri öflin móta umhverfið
Nemandi skal hafa öðlast leikni í að:
lesa jarðfræðikort
reikna gróflega fjarlægð jarðskjálfta út frá jarðskjálftalínuriti
staðsetja flekamörk, gosbelti, þverbrotabelti og möttulstrók landsins
greina helstu storkubergstegundir Íslands
greina helstu frumsteindir í storkubergi
greina algengustu holufyllingar í íslensku storkubergi
skoða mismunandi móbergsmyndanir
skoða áhrif vatns á goshegðun og myndun gosefna
skoða bergganga ásamt flestum öðrum djúpbergsmyndunum
áætla stærð og staðsetningu jarðskjálfta
greina landslag eftir kortum og loftmyndum
lýsa myndun og mótun jarðlaga og landslags með áherslu á nánasta umhverfi
Nemandi skal geta hagnýtt þá almennu þekkingu og leikni sem hann hefur aflað sér til að:
nýta gagnrýna hugsun og sjálfstæð vinnubrögð við lausn verkefna
afla heimilda, meta þær og nýta í hagnýtum tilgangi
greina, út frá útliti fjalla, megineldstöðvar og myndun basalthrauna
tengja og meta halla jarðlaga við útkulnuð og virk flekaskil
túlka jarðlög og landslag út frá myndun og mótun þeirra
tengja jarðfræðina við daglegt líf og umhverfi og gera sér grein fyrir notagildi hennar
nýta námsefni og gögn á markvissan hátt til að lýsa myndun og mótun á afmörkuðu landsvæði í nánasta umhverfi
sýna sjálfstæði í vinnubrögðum og bera ábyrgð á eigin námsframvindu
Lögð er áhersla á fjölbreytt námsmat með leiðsögn og símati.