Í áfanganum er fjallað um þróunarsögu mannsins frá upphafi. Lögð er áhersla á að nemandinn kynnist mismunandi menningarheimum og fái þjálfun í að beita afstæðishyggju sem hluta af aðferðafræði fagsins. Áhersla er á eigindlegar aðferðir og kenningar í félagslegri mannfræði. Meðal þess sem verður fjallað um er fjölbreytileiki í fjölskylduformum, hjúskapur, sifjakerfi, kynhlutverk, lagskipting, stríðsrekstur, friðarferli, hagkerfi og trúarbrögð. Lögð er áhersla á heildræna sýn mannfræðinnar og hvaða hlutverki hún gegnir í hnattrænu samfélagi nútímans. Nemandinn fær m.a. innsýn í líffræðilega mannfræði, t.d. prímatafræði og erfðamannfræði.
FÉLA2FA05 eða sambærilegur áfangi
Nemandi skal hafa öðlast þekkingu og skilning á:
sögu mannfræðinnar
kenningum og sértækum hugtökum mannfræðinnar
sérstöðu mannfræðinnar og skyldleika hennar við aðrar félagsvísindagreinar
rannsóknum mannfræðinga fyrr og nú
nokkrum fjarlægum og nálægum menningarheimum
sjálfbærri þróun
Nemandi skal hafa öðlast leikni í að:
leggja gagnrýnið mat á þróunarhugtakið bæði hvað varðar líffræðilega og menningarlega þróun
beita aðferðafræði mannfræðinga
skoða mismunandi samfélög með kenningum mannfræðinnar
beita afstæðishyggju í umræðum og þekkja takmarkanir hennar
lesa fræðilegan texta sér til skilnings
Nemandi skal geta hagnýtt þá almennu þekkingu og leikni sem hann hefur aflað sér til að:
vinna úr rannsóknargögnum og leggja mat á þau
sýna frumkvæði í verki
meta eigin frammistöðu og annarra á gagnrýninn hátt
afla upplýsinga, greina þær og setja í fræðilegt samhengi
miðla skýrt og skilmerkilega fræðilegu efni í ræðu og riti
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.