Framhaldsáfangi í almennri efnafræði.
Efnisatriði:
Eiginleikar lofts og þau lögmál sem lýsa eiginleikum þess. Ástandsjafna lofts. Efnaorka, útvermin og innvermin efnahvörf. Varmabreytingar við efnahvörf. Fyrsta lögmál varmafræðinnar, varmamælingar og myndunarvarmi. Hraði efnahvarfa, árekstrakenningin og gangur efnahvarfa. Efnajafnvægi, jafnvægisfastar og þættir sem hafa áhrif á jafnvægi. Sölt í vatnslausn, leysni og leysnimargfeldi.
EFNA1AE05 eða sambærilegur áfangi.
Nemandi skal hafa öðlast þekkingu og skilning á:
skilgreiningum á öllum efnisatriðum áfangans skv. upptalningu hér að framan
sértækum dæmum um hvert efnisatriði áfangans
Nemandi skal hafa öðlast leikni í að:
meta hvaða mælieiningar henta við útreikninga með gasjöfnunni og umreikna milli eininga eins og nauðsynlegt er
nota gasjöfnuna við útreikninga t.d. á mólafjölda, þrýstingi, rúmmáli og hita, bæði eina sér og í tengslum við stillta efnajöfnu. Ennfremur að finna ýmsar afleiddar stærðir svo sem massa og mólmassa gasefna
finna sameindarformúlu efnis út frá massaprósentum frumefna þess og mólmassa sameindarinnar
beita lögmáli Hess til að ákvarða hvarfvarma fyrir heildarhvarf sem er summa tveggja eða fleiri hvarfþrepa með þekktan hvarfvarma
nota stillta efnajöfnu til að finna orkubreytingu þegar ákveðið magn efnis hvarfast eða myndast í efnahvarfi
setja fram og nota jafnvægislögmálið m.a. til að reikna jafnvægisfasta, finna jafnvægisstyrki efna þegar K er gefið og kanna hvort jafnvægi eða ójafnvægi ríki fyrir gefna styrki efnanna
beita reglu Le Chateliers til að sjá hvernig breytingar á ytri aðstæðum raska efnajafnvægi
reikna leysnimargfeldi salta og finna leysni salts bæði í hreinu vatni og í lausn sem inniheldur aðra jón saltsins
nota jónamargfeldi og leysnimargfeldi til að segja fyrir um botnfallsmyndun
gera massa og rúmmálsmælingar og meðhöndla glervöru, efni og áhöld við tilraunir í efnafræði með eigin öryggi og annarra í huga
afla heimilda, nýta gagnabanka og miðla niðurstöðum, m.a. með skýrslugerð
Nemandi skal geta hagnýtt þá almennu þekkingu og leikni sem hann hefur aflað sér til að:
vinna skipulega að verkefnalausnum, m.a. með hliðsjón af mikilvægi mólhugtaksins, út frá þekkingu á lausnum svipaðra verkefna, eða með því að setja upp jöfnur sem eiga við gefnar forsendur
notfæra sér þekkingu úr öðrum greinum við verkefnalausnir í efnafræði
meta hvort niðurstöður útreikninga og mælinga séu raunhæfar
tengja efnafræðina við daglegt líf fólks og umhverfi og sjá notagildi hennar
skiptast á skoðunum við vinnufélaga um mælingar og niðurstöður og ræða og útskýra hugmyndir
viðhafa nákvæmni og skipuleg vinnubrögð við mælingar og tilraunavinnu sem og við tölvugagnaúrvinnslu og skýrslugerð
Námsmat er útfært í kennsluáætlun á samræmi við skólanámskrá.