Nemendur læra að undirbúa og sjóða MIG-suðu á áli og ryðfríu stáli og einnig MAG-suðu á stáli. Þeir læra að sjóða efnisþykktir 2-5 mm í stál, ryðfrítt stál og ál samkvæmt gæðaflokki C (ÍST EN 25817) í plötu og rör. Þeir skipuleggja suðuverkefni m.t.t. krafna um gæði, öryggi og umhverfi. Nemendur læra að sjóða eftir suðuferilslýsingum og öðlast þekkingu á kostum mismunandi suðuvíra og aðferða. Einnig eiga nemendur að geta gert sér grein fyrir grundvallaratriðum hitameðhöndlunar stáls í tengslum við suðu. Þeir þekkja tæki og búnað til hitameðhöndlunar og geta notað þau á réttan hátt.
Suðuáfangi á 1. hæfniþrepi.
Nemandi skal hafa öðlast þekkingu og skilning á:
reglum um öryggismál.
suðferilslýsingum og gildi þeirra.
áhrifum mismunandi skögunar vírs á straumstyrk, afköst og innbræðslu.
eiginleikum úðaboga- og stuttbogasuðu.
öryggisreglum við meðhöndlun hreinsiefna fyrir ryðfrítt stál.
helstu hættum og varúðarráðstöfunum vegna geislunar, hita, ósonmyndunar, reyks og eldfimra efna.
hlutverki hlífðarfatnaðar og hlífa.
flokkun á suðuhæfni stáls.
tilgangi forhitunar og hvenær henni skal beitt.
tilgangi afglóðunar og normalíseringar.
millistrengjahitastigi.
Nemandi skal hafa öðlast leikni í að:
stilla suðutækin, þ.e. straum, vírhraða, spennu og straumdempun (viðnám), þannig að hæfi efnisþykkt og suðurauf.
velja vír á eigin spýtur m.t.t. efnis og suðuraufar.
sinna viðhaldi á fylgibúnaði suðuvéla.
greina suðugalla í áli, stáli og ryðfríu stáli.
hreinsa oxíðhúða af ryðfríu stáli eftir suðu.
meta hvenær eftirhita skal stál eftir suðu
meta hvað gera skal til að kólnun verði hæg eftir suðu.
Nemandi skal geta hagnýtt þá almennu þekkingu og leikni sem hann hefur aflað sér til að:
setja rúlluvír í suðutækin og velja rétta spíssa, drifbúnað og barka.
stilla gasflæði, velja gashulsu og skaut.
sjóða í suðustöðum PA-BW, PA-FW, PB-FW, PC-BW, PF-FW, PF-BW.
sjóða rör á plötu.
gegnumsjóða 5 mm stálplötu öðru megin frá í suðustöðu PF-BW í V-rauf.
meta algengustu suðugalla og orsakir þeirra.
sjóða eftir suðuferilslýsingum.
mæla og skrá viðeigandi upplýsingar varðandi suðuverkefni s.s. spennu, straum, raufarstærð og aðrar upplýsingar fyrir suðuferlislýsingar.
velja rétta hitameðferð m.t.t. efnis og suðuaðferðar.
velja réttan búnað til hitameðhöndlunar.
reikna út kolefnisjafngildi efna og meta áhrif hita á kornavöxt.
Námsmat byggir á verkefnavinnu og prófum. Leitast er við að beita aðferðum leiðsagnarmats.