Í áfanganum fá nemendur æfingu í hlutbundinni forritun og einfaldri leikjaforritun í Python og Pygame. Farið er yfir mismunandi ferli við hugbúnaðargerð. Unnið verður jöfnum höndum með textabundin og myndræn notendaskil. Helstu efnisatriði: klasar og hlutir, erfðir, hugrænn klasi, viðmót, fylki, röðun, aðferðir, eiginleikar, smiðir private – public, nafnasvæði, klasasöfn, frávik, skrár, sjálfkvaðning, myndir, gagnaskipan (staflar, listar, tré...), gagnasnið o.fl.
TÖLF2TF05
Nemandi skal hafa öðlast þekkingu og skilning á:
ferlum við gerð hlutbundinna forrita
forritun í klösum
forritun með grafík og hljóðum
leit í gögnum
flóknari gagnaskipan (fylki, listar o.fl.) og snið gagna
meðhöndlun frávika
sjálfkvaðningu í forritum
Nemandi skal hafa öðlast leikni í að:
sýna sjálfstæð vinnubrögð við forritun
velja viðeigandi gagnaskipan
vinna með uppskiptingu forrits í aðalforrit og aðferðir
gera sjálfstæðra klasa, tilviksaðferða og klasaaðferða
vinna með þýðingu og keyrslu forrita í myndrænum notendaskilum
Nemandi skal geta hagnýtt þá almennu þekkingu og leikni sem hann hefur aflað sér til að:
skrifa, þýða og villuleita hlutbundin forrit
leysa forritunarverkefni með því að beita klasaforritun, aðferðum og atburðadrifinni forritun
styrkja eigin hæfni í forritun með því að nýta upplýsingar í kennslubókum og á Netinu
geta haldið áfram forritunarnámi sínu og tekist á við þyngri verkefni, hvort heldur á framhalds- eða háskólastigi
Námsmat skal vera fjölbreytt og byggja á verkefnavinnu með áherslu á leiðsagnarmat.