Áfanginn fjallar um fornöldina og miðaldir. Lögð er áhersla á upphaf mannkyns og menningar, fjallað um helstu ríki fornaldarinnar og breytingar sem urðu á miðöldum, einkum ný ríki og kristna menningu. Áherslan er mest á svæðið umhverfis Miðjarðarhafið og síðan á Vestur-Evrópu og Norðurlönd á miðöldum. Ítarlega er fjallað um landnám Íslands og þróun stjórnkerfis og menningar á Íslandi á miðöldum. Almennt talað henta söguáfangar mjög vel til fræðslu um og skoðanaskipta á öllum grunnþáttunum og auðvelt er að þjálfa öll svið lykilhæfninnar. Af einstökum grunnþáttum er í þessum áfanga sérstök áhersla á jafnrétti, lýðræði, mannréttindi, heilbrigði og sköpun í umræðu um heimspeki, stéttskiptingu, trúarbrögð og stjórnarfar fornaldar og miðalda.
Nemandi skal hafa öðlast þekkingu og skilning á:
völdum þáttum í sögu mannkyns og Íslands frá upphafi til byrjunar nýaldar
algengum hugtökum sem notuð eru í framsetningu á sögulegu efni
því hvernig mannkyninu fjölgar, hvernig ríki verða til, hvers vegna þau vaxa og hnigna
mikilvægi gagnrýnnar hugsunar
helstu tegundum heimilda og einföldum vinnubrögðum við heimildaleit og heimildanotkun
tengslum fortíðar og nútíðar
Nemandi skal hafa öðlast leikni í að:
lesalesa einfaldan texta á íslensku einfaldan texta á íslensku
tengja atburði og áreiti úr nútímanum við það sem áður hefur gerst
nota heimildir til að setja saman eigin texta
að taka saman stutta umfjöllun um afmarkað sögulegt efni og kynna það fyrir jafningjum
Nemandi skal geta hagnýtt þá almennu þekkingu og leikni sem hann hefur aflað sér til að:
setja sjálfan sig og samtíð sína í samhengi við söguna
setja sig í spor fólks á ýmsum tímum
taka þátt í skoðanaskiptum og rökræðum með jafningjum um þau sagnfræðilegu efni sem tekin eru fyrir í áfanganum
Námsmat miðast við sérstakt lokapróf sem gildir 50% og símat 50%. Beitt er jöfnum höndum hefðbundnu mati og óhefðbundnu og fjölbreyttum matsaðferðum.
Þekkingin er metin með lokaprófi, stuttum prófum og verkefnum sem bæði eru unnin í tímum og heima.
Leiknin er metin út frá vinnubrögðum við notkun heimilda, samningi eigin texta og skilningi á lesnum texta.
Hæfnin er metin út frá þátttöku og árangri í samræðum, rökræðum og skoðanaskiptum við jafningja og kennara og hvernig nemendum gengur að miðla efni til jafningja sinna.