Í áfanganum er fjallað um stjörnufræði sem fræðigrein og gerð grein fyrir sögu hennar. Farið er yfir kenningar um upphaf, uppbyggingu og þróun alheimsins með áherslu á sólkerfið, bæði innri og ytri reikistjörnurnar, loftsteina og halastjörnur og aðferðir til rannsókna á þeim. Nemendur vinna með kenningar um uppruna efnisins, þróun fastastjarna og gerð og myndun svarthola. Þá er fjallað um rannsóknaráætlanir og nýjustu uppgötvanir og möguleika á sviði geimferða og rannsókna. Áhersla er lögð á verkefnavinnu, athuganir og tilraunir, stjörnuskoðun, kortalestur og nýtingu upplýsingatækni.
NÁTT2JA05 (NÁT2B05)
Nemandi skal hafa öðlast þekkingu og skilning á:
grunndráttunum í sögu stjörnufræðinnar.
helstu hugtökum og heitum í stjörnufræði.
uppruna, uppbyggingu og þróun alheimsins.
þróun mismunandi fastastjarna frá fæðingu til endaloka.
myndun og þróun sólkerfisins og stöðu jarðar innan þess.
möguleikum og aðferðum stjörnufræðinga til að rannsaka fyrirbæri í alheiminum.
Nemandi skal hafa öðlast leikni í að:
segja frá þróun stjörnufræðinnar og helstu nútímaaðferðum til að rannsaka fyrirbæri alheimsins.
beita algengustu hugtökum og heitum í stjörnufræði í umfjöllun um alheiminn og sólkerfið.
gera grein fyrir upphafi, uppbyggingu og þróun alheimsins og helstu fyrirbæra sem þar finnast.
nota stjörnukort, litla stjörnusjónauka og hugbúnað til stjörnuskoðunar.
Nemandi skal geta hagnýtt þá almennu þekkingu og leikni sem hann hefur aflað sér til að:
greina og segja frá helstu fyrirbærum sem sjást á stjörnuhimninum bæði með berum augum og í litlum stjörnusjónaukum sem metið er með athugunum, dagbókum, kynningum, verkefnum og skriflegu prófi.
segja frá helstu kenningum um uppruna, uppbyggingu og þróun alheimsins og sólkerfisins sem metið er með kynningum, verkefnum og skriflegu prófi.
segja frá sólinni, reikistjörnum, loftsteinum og halastjörnum í okkar sólkerfi og könnun þess sem metið er með kynningum, verkefnum og skriflegu prófi.
fylgjast með könnun alheimsins og nýjum hugmyndum um tilurð hans, gerð og þróun sem metið er með verkefnum, kynningum og skriflegu prófi.
Lögð er áhersla á verkefnavinnu, athuganir og tilraunir, stjörnuskoðun, stjörnukortalestur og nýtingu upplýsingatækni, s.s. stjörnufræðiforrita og líkana. Einnig er notað leiðsagnarmat og próf.