Áfanginn veitir heildstæða yfirsýn yfir vistfræði sem fræðigrein, aðferðafræði hennar og viðfangsefni. Lögð er áhersla á sérstöðu Íslands og helstu gerðir vistkerfa sem hér finnast á landi og sjó. Kynntar eru helstu aðferðir sem notaðar eru í vistfræði og kynntar verða rannsóknir í greininni hér á landi. Í áfanganum er fjallað um uppbyggingu, orkuflæði og efnahringrásir vistkerfa og teknar fyrir kenningar sem lúta að stöðugleika og kviku jafnvægi vistkerfa. Fjallað er um líffræðilegan fjölbreytileika og breytingar á tegundasamsetningu líffélaga, bæði af náttúrulegum orsökum og af völdum manna. Stofnhugtakið er tekið fyrir og skoðaðar helstu mælingaaðferðir og rannsóknir á stofnum. Fjallað er um sjálfbæra nýtingu lífrænna auðlinda og helstu nytjastofna hér við land. Rætt er um aðlögun og hæfni lífvera og áhrif vistfræðilegra þátta á þróun þeirra og atferli. Gert er ráð fyrir fjölbreyttri verkefnavinnu nemenda í áfanganum sem m.a. krefst vettvangsferða, heimsókna, upplýsingaöflunar og framsetningar ýmissa smærri og stærri verkefna
SNAT1SN10 og líffræðiáfangi á öðru þrepi
Nemandi skal hafa öðlast þekkingu og skilning á:
helstu hugtökum vistfræðinnar
orkuflæði og efnahringrásum vistkerfa
áhrifum lífrænna og ólífrænna þátta
tengslum lífvera í gegn um fæðukeðjur og fæðuvefi
uppbyggingu vistkerfa
einkennum ólíkra vistkerfa
rannsóknaraðferðum í vistfræði
Nemandi skal hafa öðlast leikni í að:
greina lífverur með handbókum og lyklum
framkvæma einfaldar tilraunir
vinna úr rannsóknarniðurstöðum
leita að heimildum sem tengjast viðfangsefninu og vinna með þær
Nemandi skal geta hagnýtt þá almennu þekkingu og leikni sem hann hefur aflað sér til að:
draga ályktanir af niðurstöðum tilrauna
skila af sér niðurstöðum og túlkun þeirra með skipulögðum hætti, t.d. með skýrslu eða kynningu
skrifa vandaða ritgerð um vistfræðileg málefni með góðum stuðningi heimilda
tengja vistfræðilega þekkingu sína við daglegt líf og átti sig á ábyrgð sinni
taka rökstudda afstöðu til vistfræðilegra málefna
Námsmat áfangans verður fjölbreytt og mun taka mið af þekkingu, leikni og hæfni nemenda. Matið gæti t.d. samanstaðið af prófum, mati á verkefnum, t.d. ritgerð, skýrslum og fyrirlestrum nemenda, jafningjamati í hópavinnu, dagbókarskrifum nemenda, mati á virkni og þátttöku í umræðum