Í áfanganum er lögð áhersla á að nemandinn hljóti aukna þjálfun í smíði eftir teikningum. Áhersla er lögð á notkun verkstæðisvéla s.s. rennibekkja, fræsivéla, borvéla, niðurefnunarvéla o.fl., meðferð og umhirðu þeirra. Nemandinn lærir að slípa bora og spónskurðarverkfæri, sem hann þarf að nota við smíðina, sem og að nota handbækur og töflur. Áhersla er á að nemandinn öðlist nægilega færni til að leysa tiltölulega einföld verkefni í rennibekk og fræsivél, innan 0,1 mm málvika. Samhliða kennslunni fer fram fræðsla um slysahættu og öryggisþætti á vinnustað, þar sem rík áhersla er lögð á umgengni við vélar og verkfæri sem unnið er með.
SMÍÐ1NH05
Nemandi skal hafa öðlast þekkingu og skilning á:
mismunandi skrúfgengjum og vinnuútfærslu þeirra
helstu hlutum rennibekkja, fræsivéla og borvéla og heiti þeirra
vinnsluháttum og fylgibúnaði rennibekkja, fræsivéla og borvéla
handbókum og töflum og notkunarmöguleikum þeirra
almennum öryggisreglum á vinnusvæði
virkni flóknari véla til smíða
Nemandi skal hafa öðlast leikni í að:
renna og fræsa verkefni samkvæmt teikningum
nota algengustu mæli- og uppmerkitæki
nota áhöld sem hæfa efninu sem unnið er með
draga bor og rennistál
slípa bora og spónskurðarverkfæri
bora og snitta í málma af mismunandi gerðum
lesa flóknari teikningar en áður
Nemandi skal geta hagnýtt þá almennu þekkingu og leikni sem hann hefur aflað sér til að:
áætla magn og efnistaka það efni sem gefið er upp samkvæmt teikningum
útbúa verkáætlun
leysa einföld verkefni í rennibekk og fræsivél, innan 0,1 mm málvika
nýta handbækur og töflur við vinnslu verkefna
velja áhöld sem hæfa efninu sem unnið er með
finna út snúnings- og færsluhraða spóntökuvéla
skipuleggja vinnu sína á sjálfstæðan hátt
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.