Farið er yfir vélfræði brunahreyfla og flokkun þeirra eftir ýmsum viðmiðunum: vinnureglu, gasreglu, ventlatíma, vélareikningi, efnasamsetningu afgass, byggingarlagi hreyfla og vélahluta. Áhersla er lögð á strokkstykki, strokklok, sveifarbúnað, þ.m.t. stimpla, ventlabúnað, kælikerfi og smurkerfi. Farið er yfir þéttingar hreyfla og skrúffestingar. Áhersla er lögð á hreinlæti í umgengni, meðhöndlun véla og vélahluta. Nákvæmni í skoðun, mælingum á ástandi hreyfils og íhlutum hans. Farið yfir hvernig meta skuli ástand eftirfarandi: þéttleika strokka hreyfilsins, m.a. með þjöppumælingu, hreyfibúnað ventla, þ.e. vippur, kambás, kambásdrif, strokklok, blokk, ventla, ventlagorma og tilheyrandi. Kynnt er notkun hlustunartækja við greiningu bilana og gerðar verklegar æfingar á lausum strokklokum og íhlutum. Strokklok er tekið af hreyfli, ástand þess metið, framkvæmd viðeigandi viðgerð og strokklokið sett aftur á hreyfilinn. Fjallað er um nauðsyn hreinlætis við vélaviðgerðir. Áhersla er lögð á mælingar ástands íhluta, sjónskoðun, eðli og ástandi skrúffestinga. Upprifjun á efnisfræði hreyfla og tengds búnaðar. Farið er yfir smurkort/olíuleiðbeiningar, losun olíu af forðageymum, áfyllingar, skipt um síur og mældur smurolíuþrýstingur. Smurolíudælur, olíuleiðslur og olíugangar yfirfarnir. Farið er í hvar helst er hætta á olíuleka eða olíueyðslu. Tæming og áfylling kælivökva. Gerðar prófanir á kælikerfi og miðstöð: hitastjórnun, þrýstiþol, leki, frostþol. Skipt um kæli, kæliviftu, viftureim, kælivökvadælu, hitaliða og slöngur. Meðhöndlun á úrgangsvökvum, þ.e. olíu og kælivökva. Skýrðar eru ástæður þess að olía geti verið í vatni eða vatn í olíu. Farið er yfir virkni loftfrískunarkerfa (AC) og sérstaka mengunarhættu af kælimiðli þessara kerfa (reglugerð 834/2010). Æfð vinnubrögð við að lyfta ökutæki og vinna undir ökutæki þ.m.t. öryggisatriði við vinnu undir ökutæki á lyftu.
Nemandi skal hafa öðlast þekkingu og skilning á:
helstu gerðum brunahreyfla í ökutækjum og byggingarlagi þeirra
vinnureglu brunahreyfla, gasreglu brunahreyfla og ventlatíma
nöfnum og hlutverkum einstakra vélahluta og íhluta
helstu gerðum skrúfukerfa: gengja, lykilgrips og teygjubolta
mæliatriðum sem varða ventlabúnað hreyfla og strokkloks
Nemandi skal hafa öðlast leikni í að:
þjöppumæla strokka
endurnýja (skera) ventla og ventilsæti
taka af/setja á strokklok hreyfils
skipta um olíu og síur
mæla smurþrýsting
prófa kælikerfi
skipta um kælivökvadælu, hitaliða, slöngur og kæli
tengja prófunartæki fyrir loftfrískunarkerfi (AC) og lesa af niðurstöðum
Nemandi skal geta hagnýtt þá almennu þekkingu og leikni sem hann hefur aflað sér til að:
lýsa tilgangi einstakra vélahluta og íhluta
lýsa ventlatíma og tímun kambása
lýsa virkni hreyfilsins og tengds búnaðar sem heildar
meta ástand strokka hreyfilsins, hreyfibúnað ventlanna, þ.e. vippur, kambása og kambásdrif, strokklok og blokk (þéttifleti og skrúfganga), ventlagorma og tilheyrandi
lýsa virkni loftfrískunarkerfa (AC), benda á íhluti kerfisins og lýst hlutverki þeirra
yfirfara og prófa miðstöð
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.