Farið er yfir helstu einkenni íslenskra stjórnmálaflokka og stjórnkerfis í samhengi við byggða- og samfélagsþróun eftir 1900 og fjallað um hugmyndafræði flokkanna í alþjóðlegu samhengi. Íslenska valdkerfið skoðað, þrískipting ríkisvaldsins, stjórnarskráin og samspil helstu valdþátta. Markmiðið er að nemendur þekki í grófum dráttum sögu og einkenni íslenska stjórnkerfisins og flokkanna, skilji hvernig valdaþættir spila saman og viti hvar helstu átakalínur liggja. Efnið á að auðvelda nemendum að leggja gagnrýnið mat á álitaefni stjórnmálanna og taka þátt í lýðræðislegri umræðu á upplýstan hátt. Áhersla er lögð á að fjalla um málefni sem efst eru á baugi í stjórnmálum, efnahagsmálum og félagsmálum og tengja við málefni sem nemendur hafa sérstakan áhuga á.
FÉLA2KR05
Nemandi skal hafa öðlast þekkingu og skilning á:
helstu viðfangsefnum, aðferðum og hugtökum stjórnmálafræðinnar
hugmyndafræði, stefnu og viðhorfum í stjórnmálum
þrískiptingu ríkisvaldsins og helstu stoðum íslenska stjórnkerfisins
þróun íslenska valdakerfisins, stjórnmálaflokka og helstu hagsmunasamtaka
Nemandi skal hafa öðlast leikni í að:
afla sér traustra upplýsinga um stjórnmálaleg efni
greina upplýsingarnar og setja í fræðilegt samhengi
beita hugtökum stjórnmálafræðinnar á dagleg pólitísk úrlausnarefni
tengja sögu íslensku flokkanna við helstu hugmyndakerfi í stjórnmálum
Nemandi skal geta hagnýtt þá almennu þekkingu og leikni sem hann hefur aflað sér til að:
skilja pólitískt samhengi í samfélaginu
þekkja birtingarform einstakra stjórnmálastefna í samfélagslegum ákvörðunum
rökræða pólitísk og samfélagsleg álitaefni á málefnalegan og gagnrýninn hátt
ræða og mynda sér skoðanir byggðar á rökum úr stjórnmálafræði
Námsmat er útfært í kennsluáætlun í samræmi við skólanámskrá.