Í áfanganum er fjallað um frumkvöðla félagsfræðinnar og kynntar helstu kenningar og rannsóknaraðferðir greinarinnar. Tengsl einstaklinga og samfélags eru skoðuð og greind í ljósi ólíkra kenninga. Í áfanganum er farið yfir vítt svið félagsfræðinnar og nemendur fá þjálfun í að beita félagsfræðilegu innsæi við túlkun á samfélaginu, bæði almennt og á tiltekin viðfangsefni. Bornar verða saman eigindlegar og megindlegar rannsóknir og tengsl þeirra við kenningar. Nemendur fá þjálfun í að beita rannsóknaraðferðum og fylgja vísindalegu rannsóknarferli þar sem áhersla verður lögð á aðferðafræðileg og siðferðileg vandamál tengd rannsóknum í félagsvísindum. Meginmarkmið áfangans er að auka áhuga, þekkingu og skilning nemenda á kenningum og rannsóknaraðferðum til þess að þeir verði færir um að meta, taka afstöðu til og fjalla á gagnrýninn hátt um rannsóknir félagsvísindamanna. Nemendur eiga síðan einnig að geta beitt þessum vísindalegu aðferðum í rannsóknarvinnu sinni.
Inngangur að félagsvísindum INNF1IF05
Nemandi skal hafa öðlast þekkingu og skilning á:
kenningarsjónarhornum félagsfræðinnar; samskipta-, samvirkni- og átakakenningum
megindlegum og eigindlegum rannsóknaraðferðum
helstu hugtökum félagsfræðinnar
Nemandi skal hafa öðlast leikni í að:
tengja saman rannsóknarniðurstöður og kenningar
beita kenningum á mismunandi viðfangsefni
beita hugtökum á mismunandi viðfangsefni
beita rannsóknaraðferðum á mismunandi viðfangsefni
taka fræðilega afstöðu til samfélagslegra álitamála
Nemandi skal geta hagnýtt þá almennu þekkingu og leikni sem hann hefur aflað sér til að:
skoða félagsleg viðfangsefni með mismunandi kenningarlegum gleraugum
geta lagt mat á rannsóknir í félagsvísindum
leggja mat á hvaða rannsóknaraðferðir henta best á ólík rannsóknarefni og við misjafnar aðstæður
geta metið sitt eigið vinnuframlag og annarra
geta sett fram efni sitt í máli og riti af kunnáttu, yfirvegaðan hátt og leikni