Áfanginn er framhaldsáfangi í klassískri eðlisfræði. Lögð er áhersla á úrlausnarefni sem tengjast öðru námi nemenda við skólann en eru jafnframt góður undirbúningur fyrir háskólanám í tæknifræði, verkfræði og skyldum greinum.
Til umfjöllunar eru valin atriði úr varmafræði, aflfræði og vökvaaflfræði. Meðal viðfangsefna eru:
- Lofttegundir í kyrrstöðu og á hreyfingu, loftþrýstingur, ástandsjafna lofttegunda, varmarýmd, eðlisvarmi, varmaskipti og varmi í fasaskiptum, mettun, suða og raki andrúmslofts og fleira
- Hreyfing í tveimur víddum, snúningshreyfing, tregðuvægi, snúningsorka og fleira
- Vökvar í kyrrstöðu og á hreyfingu, jafna Bernoullis og fleira
Nemandi skal hafa öðlast þekkingu og skilning á:
helstu hugtökum varmafræðinnar
mettun, suðu og raka og mikilvægi þessara hugtaka í umfjöllun um andrúmsloft
helstu hugtökum aflfræðinnar sem snúa að hreyfingu í tveimur víddum
helstu hugtökum vökvaaflfræðinnar
sambandi hreyfingar og þrýstings í vökvum og lofttegundum
Nemandi skal hafa öðlast leikni í að:
leysa verkefni þar sem varmaskipti og fasabreytingar koma við sögu
leysa verkefni um staðsetningu, hraða og hröðun í tveimur víddum
leysa verkefni þar sem hringhreyfing kemur við sögu
leysa verkefni þar sem massatregðuvægi kemur við sögu
nýta sér jöfnu Bernoullis við lausn verkefna í vökvaaflfræði
leysa flóknari verkefni þar sem samband vinnu og ýmissa orkuforma kemur við sögu, hvort sem um er að ræða stöðuorku, hreyfiorku eða varmaorku og hvort sem hreyfingin er í einni eða tveimur víddum
Nemandi skal geta hagnýtt þá almennu þekkingu og leikni sem hann hefur aflað sér til að:
skrá lausnir sínar skipulega, skiptast á skoðunum um þær við aðra og kynna niðurstöður sinar fyrir öðrum með formlegum hætti
átta sig á tengslum ólíkra aðferða við framsetningu útreikninga og valið aðferð við hæfi
gera samanburð, áætlanir og taka ákvarðanir í verkefnum sem byggjast á efni áfangans
takast á við frekara nám í vélfræði, tæknifræði, verkfræði og skyldum greinum þar sem hugtök eðlisfræðinnar koma við sögu