Áfanginn fjallar um stöðu kynjanna og staðalmyndir í samfélaginu út frá helstu kenningum kynjafræðinnar og tengingu við mannréttindi í lýðræðissamfélögum á Vesturlöndum. Fjallað er um kynferði sem félagslegan áhrifaþátt og tengingu við hugtök eins og jafnrétti, réttlæti, karlmennsku/kvenmennsku, fötlun, klám, kynbundið ofbeldi, lýðræði og fleira. Rýnt verður í ýmsar birtingarmyndir kynjaskekkju, ýmis önnur svið mismununar og rökrætt hvaða hlutverkum mannréttindi eiga að þjóna í samfélaginu. Markmið áfangans er að kynna og nota kenningar innan kynjafræðinnar til aukins skilnings á innviðum og hugmyndafræði samfélagsins og æfa um leið rökræður og sjálfstæða skoðanamyndun um málefni sem snúa að þeim. Lögð er áhersla á umræður og lýðræðislega nálgun í kennslunni þar sem nemendur eru krafðir um þátttöku og áhrif á efnisþætti áfangans. Áfanginn byggir á virkni og þátttöku nemenda þar sem reynir á sjálfskoðun og greiningu á umhverfi sínu með hliðsjón af kenningum kynjafræðinnar.
Tíu fein. í félagsfræði á 2. þrepi.
Nemandi skal hafa öðlast þekkingu og skilning á:
helstu hugtökum og viðfangsefnum kynjafræðinnar
mismunandi mótun kynjanna út frá menningu, umhverfi og tíma
umræðu um jafnrétti og mismunun
áhrifum staðalmynda
birtingarmyndum kynjaskekkju í nærsamfélagi og frá alþjóðlegu sjónarhorni
tengslum mannréttinda við lýðræðissamfélög
Nemandi skal hafa öðlast leikni í að:
greina stöðu og staðalmyndir kynjanna í fjölmiðlaefni, námsefni og almennri umræðu
greina goðsagnir varðandi kynjamun og kynímyndir í samfélaginu
afla upplýsinga, greina þær og setja í fræðilegt samhengi
beita hugtökum kynjafræði á ólíkar aðstæður
meta jafnrétti og réttlæti út frá menningarlegum gildum samfélagsins
Nemandi skal geta hagnýtt þá almennu þekkingu og leikni sem hann hefur aflað sér til að:
greina áhrif kynferðis á líf hans og annarra
geta tekið þátt í rökræðum um stöðu kynjanna og um önnur jafnréttismálefni
geta sett fram þekkingu sína í ræðu og riti
skilja helstu orsakir kynjaskekkju samkvæmt hugmyndum kynjafræðinnar
Námsmat er útfært í kennsluáætlun í samræmi við skólanámskrá.