Í áfanganum læra nemendur að undirbúa og sjóða MIG-suðu og TIG-suðu á áli, ryðfríu stáli og einnig á stáli. Þeir læra að sjóða efnisþykktir 2 – 6 mm í stál , ryðfrítt stál og ál samkvæmt gæðaflokki C (ÍST EN 25817) í plötu og rör. Þeir skipuleggja suðuverkefni m.t.t. krafna um gæði, öryggi og umhverfi. Nemendur læra að sjóða eftir suðuferilslýsingum og öðlast þekkingu á kostum mismunandi suðuvíra og aðferða. Nemendur læra MIG/MAG-suðu í efnisþykktum 2 – 6 mm og TIG-suðu í efnisþykktum 1 – 3 mm. Lögð er áhersla á að nemendur öðlist grunnfærni og þekkingu á suðuaðferðum, að þeir þekki mun á þeim, kostum þeirra og göllum og geti soðið stál, ryðfrítt stál og ál. Farið er yfir öryggisbúnað s.s. hlífðarfatnað og hlífar, hættur og helstu varúðarráðstafanir vegna þeirra.
MLSU2VB03BV
Nemandi skal hafa öðlast þekkingu og skilning á:
suðuferilslýsingum og gildi þeirra.
áhrifum mismunandi skögunar vírs á straumstyrk, afköst og innbræðslu.
eiginleikum úðaboga- og stuttbogasuðu.
aðferðum til að hreinsa oxíðhúð af áli fyrir suðu og af ryðfríu stáli eftir suðu.
helstu suðugöllum í áli og orsökum þeirra.
áhrifum suðu á tæringarþol í ryðfríu stáli.
gastegundum og gasblöndum sem notaðar eru við suðu á stáli, áli og ryðfríu stáli.
hlutverki hlífðargassins og stillingum þess.
hlutum suðubyssunnar, drifbúnaði og leiðara fyrir MIG/MAG og TIG.
öryggisreglum við meðhöndlun hreinsiefna fyrir ryðfrítt stál.
hlífðarfatnaði og hlífum og helstu hættum og varúðarráðstöfunum vegna geislunar, hita, ósonmyndunar, reyks, ásamt eldfimum efnum.
virkni suðutækja, drifbúnaði og pólun.
ýmsum gerðum kveikinga og virkni viðnámsspólu í MIG/MAG og TIG suðutækjum.
brunahættu vegna straumleiðara.
Nemandi skal hafa öðlast leikni í að:
stilla suðutækin þ.e. straum, vírhraða, spennu og straumdempun (viðnám), þannig að hæfi efnisþykkt og suðurauf.
setja rúlluvír í suðutækin og velja rétta spíssa, drifbúnað og barka.
sjóða í suðustöðum PA-BW, PA-FW, PB-FW, PC-BW, PF-FW, PF-BW.
gegnumsjóða 5 mm stálplötu öðrum megin frá í suðustöðu PF-BW í V-rauf.
hreinsa oxíðhúð af áli fyrir suðu og hreinsa oxíðhúð af ryðfríu stáli eftir suðu.
sjóða eftir suðuferilslýsingum.
nota TIG- og MIG/MAG suðu til að sjóða saman hluti í ýmsum suðustöðum s.s. PA-BW, PA-FW og PF-FW.
nota hlífðarfatnað og öryggisbúnað.
Nemandi skal geta hagnýtt þá almennu þekkingu og leikni sem hann hefur aflað sér til að:
stilla suðutækin, þ.e. straum, vírhraða, spennu og viðnám, stilla gasflæði, velja gashulsu og skaut.
velja vír m.t.t. efnis og suðuraufar, velja rétta spíssa.
greina og meta algengustu suðugalla og orsakir þeirra.
mæla og skrá viðeigandi upplýsingar varðandi suðuverkefnið s.s. spennu, straum, raufarstærð og aðrar upplýsingar fyrir suðuferilslýsingar.
sinna viðhaldi á fylgibúnaði suðuvéla.
greina helstu hættur, gera varúðarráðstafanir og velja og nota viðeigandi öryggisbúnað.
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá.