Nemendur öðlast góða undirstöðuþekkingu á rafkerfum skipa með allt að 750 kW aðalvél og þjálfast í að nýta sér upplýsingar sem aflað er með lestri teikninga af rafkerfum slíkra skipa. Sérstök áhersla er lögð á riðstraumsvélar og tengingar riðstraumsrafala við net í gegnum varnarbúnað. Einnig tengingar riðstraumsmótora við net í gegnum algengan tengi- og ræsibúnað.
RAMV2VA04BV
Nemandi skal hafa öðlast þekkingu og skilning á:
gerð, uppbyggingu og vinnumáta þriggja fasa riðstraumsrafala og mótora.
samfösun riðstraumsrafala.
tengingum og varnarbúnaði mótora.
ræsibúnaði rafmótora með Y/D ræsi og mjúkræsi.
hraðastjórnun riðstraumsmótors.
tengingu hraðastýringa við net.
mismunandi möguleikum til hraðastýringa þriggja fasa riðstraumsmótora.
uppbyggingu riðstraumstöflu í skipum.
búnaði og skilyrðum til samfösunar þriggja fasa rafala við raforkunet.
virkni og uppbyggingu einfasa riðstraumsmótora og notkunarsviði þeirra.
Nemandi skal hafa öðlast leikni í að:
tengja rafmótor við net með algengum ræsibúnaði.
nota hefðbundinn samfösunarbúnað.
vinna með hraðastjórnunarbúnað riðstraumsmótora.
tengja hraðastýringar við net og mótor.
fasa saman rafala.
Nemandi skal geta hagnýtt þá almennu þekkingu og leikni sem hann hefur aflað sér til að:
starfa við rafkerfi skipa með allt að 750 kW aðalvél.
fasa þriggja fasa rafala við raforkunet.
lesa teikningar af rafkerfum skipa og geta nýtt upplýsingar úr þeim til að öðlast yfirsýn yfir rafkerfið.
vinna kerfisbundið að bilanaleit í rafkerfum skipa með allt að 750 kW aðalvél.
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá.