: Í þessum áfanga kynnast nemendur því að fara út að ganga í náttúrunni, njóta hennar og sigrast á sjálfum sér. Lögð er áhersla á að byggja upp gönguþrek og úthald. Nemendur fræðast um hagnýta hluti sem tengjast gönguferðum og fjallgöngum og upplifi íslenska náttúru í góðum félagsskap. Nemendur fræðist um náttúruna og læri að bera virðingu fyrir henni. Lögð er áhersla á að fræða nemendur um mikilvægi þess að vera í góðu líkamlegu og andlegu formi, um útbúnað, fyrstu hjálp, mataræði og ferðaáætlun. Markmið námsins er að hafa uppbyggjandi áhrif á líkamlega heilsu, andlega og félagslega líðan. Áfanginn byggist á því að styrkja sjálfsmynd nemanda og auka vellíðan hans með fjallgöngum.
Nemandi skal hafa öðlast þekkingu og skilning á:
Gildi útivistar og hreyfingar fyrir heilsu og vellíðan með því að byggja markvisst upp gönguþrek og úthald.
Mikilvægi góðs undirbúnings fyrir gönguferðir á fjöllum sem og almennum búnaði og öryggistækjum.
Verkefnum sem snúa að skipulagningu og undirbúningi fyrir fjallagöngu hvað varðar búnað og pökkun í bakpoka.
Grunnþekkingu á þeim svæðum sem gengin eru (veðráttu, landafræði, jarðfræði og sögu þeirra áfangastaða sem valdir eru).
Nemandi skal hafa öðlast leikni í að:
Að undirbúa sig fyrir lengri gönguferðir hvað varðar viðeigandi útbúnað og nesti.
Að þekkja náttúru á völdum gönguleiðum, t.d. hvað varðar gróður, dýralíf og jarðsögu.
Að útbúa sig eftir aðstæðum hverju sinni nota helstu öryggistæki og útbúnað til fjallaferða og í lengri göngum.
Að fara í fjallgöngur eða í skipulagðar lengri gönguferðir með ferðafélagi, einn eða með fjölskyldu og vinum
Nemandi skal geta hagnýtt þá almennu þekkingu og leikni sem hann hefur aflað sér til að:
Að fara í skipulagðar gönguferðir með ferðafélagi og kunna að lesa á göngukort og velja sér leiðir út frá því.
Að meta og ákveða hvaða búnað þarf til ferðarinnar og safna saman upplýsingum, taka myndir og búa til minningar um ferðalagið.
Að geta miðlað þekkingu sinni um heilsusamleg áhrif útivistar og fjallamennsku til annarra á jákvæðan hátt.
Að vera meðvitaður um umhverfi sitt og læra að njóta þess