Unnið verður með alla þætti íslenskunnar og grunnþátturinn jafnrétti verður hafður að leiðarljósi. Notaðar verða aldursmiðaðar bókmenntir sem gefa fjölbreytta sýn á aðstæður og umhverfi ungs fólks. Fjölbreytt verkefni nýtt í kennslunni. Jafnréttishugtakið er skoðað í þeim tilgangi að leitast við að greina aðstæður sem leiða til mismununar og forréttinda. Hugtök sem unnið verður með eru til dæmis aldur, búseta, kyn, kynhneigð, menning, trúarbrögð, lífsskoðanir, menntun, minnihlutahópar og litarháttur. Megin áhersla verður á að nemendur viðhaldi og byggi ofan á þann grunn sem þeir búa nú þegar að.
Nemandi skal hafa öðlast þekkingu og skilning á:
jafnrétti í víðu samhengi
fjölbreytileika mannlífsins
hugtakinu minnihlutahópur
að allir hafa hæfileika og þroskamöguleika
mikilvægi þess að eiga valmöguleika
Nemandi skal hafa öðlast leikni í að:
átta sig á fjölbreytileika samfélagsins og mismunandi menningarheimum
að beita gagnrýnni hugsun
virða eigin skoðanir og annarra
taka þátt í umræðum
Nemandi skal geta hagnýtt þá almennu þekkingu og leikni sem hann hefur aflað sér til að:
skilja þá hugsun sem felst í hugtakinu jafnrétti
spyrja spurninga og hlusta á sjónarmið annarra af víðsýni
átta sig á mikilvægi þess að hafa val
láta skoðanir sínar í ljós
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.