Í áfanganum læra nemendur um smíði innréttinga og innihurða með áherslu á spónlagningu, yfirborðsmeðferð og vélavinnslu plötuefnis. Lögð er áhersla á grunnatriði spónlagningar eins og plötu‐ og spónlagningarefni, áhöld, tæki, spónskurð, mynstrun og spónlímingu. Teknar eru fyrir samsetningar á plötuefni, smíðisfestingar, smíðistengi og uppsetning á innréttingum. Gerð er grein fyrir iðnaðarframleiðslu á innréttingum og innihurðum og mikilvægi þess að staðla vinnuferli og gerð, stærð og lögun framleiðsluvöru. Kennslan er aðallega verkleg og byggist á spónlagningu og plötusmíði þar sem nemendur fá þjálfun í að smíða skápa og innihurðir.
Einnig læra nemendur grunnatriði í virkni og notkun tölvustýrðra trésmíðavéla með áherslu á sambandið milli tölvuteikninga (CAD), færsluskipana (CAM) og framleiðslu (CNC). Fjallað er um helstu hugtök sem tengjast notkun tölva í fram-leiðsluumhverfi, stafræna stýringu og forritun CNC-véla. Áherslan er á uppbyggingu CNC-forrita og hvernig hægt er að nota CAM-hugbúnað til að líkja eftir vinnslu á CNC-vél. Nemendur öðlast einnig þekkingu í öryggismálum varðandi umgengni við tölvustýrðar vélar.
TRÉS1SA06BB
Nemandi skal hafa öðlast þekkingu og skilning á:
smíði innréttinga, framleiðsluferli og notkun efna.
öryggisreglum og öryggisbúnaði við framleiðslu innréttinga.
viðarspæni og plastefnum sem notuð eru til spónlagningar.
plötuefni og límtré sem notað er í innréttingar og innihurðir.
notkun glers, málma og dúka í smíði innréttinga og innihurða.
samsetningaraðferðum, verkfærum og tækjum sem notuð eru í innréttinga‐ og innihurðasmíði.
öryggisreglum og öryggisbúnaði viðkomandi áhalda og véla.
mismunandi lími og öryggisreglum við meðferð þess.
mismunandi yfirborðsmeðferð á innréttingum og innihurðum.
helstu gerðum skápa- og innihurða.
NC- og CNC-stýringum.
tölvustýrðum vinnslustöðvum með 3 til 4 ásum.
grunnatriðum CNC-véla og virkni þeirra.
hegðun x-y-z ása.
núllpunktum fyrir vél og smíðahlut og tilvísunarpunktum með tilliti til uppsetningar á borði og vinnslu vélar.
algengustu ISO-kóðum.
öllum þáttum fræsiferils og samhengi þeirra.
Nemandi skal hafa öðlast leikni í að:
smíða, setja upp og meðhöndla innréttingar.
slípa og yfirborðsmeðhöndla spónlagða hluti í höndum og vélum.
staðsetja og taka úr fyrir lömum og skrám með tækjum og vélum.
nota vélar og verkfæri til innréttingasmíða.
smíða spjaldahurðir, skáphurðir, skúffur og aðra fylgihluti.
skera, klippa og líma saman spón með algengustu mynstrum.
kantlíma og spónleggja plötuefni með þvingum og í spónlagningarpressu.
meðhöndla skaðleg efni við framleiðslu innréttinga.
Leiðrétta fræsiferli með tilliti til uppsetningar á verkfæri og fræsilínu.
Nemandi skal geta hagnýtt þá almennu þekkingu og leikni sem hann hefur aflað sér til að:
skipuleggja framleiðsluferli.
velja viðeigandi efni, verkfæri og vélar.
reikna vinnsluhraða.
öðlast innsýn í uppbyggingu, notkun og fyrirbyggjandi viðhald vökva‐, loft‐ og tölvustýrðra trésmíðavéla.
fara eftir öryggisreglum og nota öryggisbúnað við yfirborðsmeðferð.
vinna í samræmi við viðurkenndar öryggisreglur og öryggisbúnað.
setja upp verkfæri á tölvustýrðar trésmíðavélar.
umgangast tölvustýrðar vélar og þekkja öryggistriði þeirra.