Í áfanganum kynnist nemandinn skynjaratækni og ýmsum gerðum skynjara, s.s. spanskynjara, rýmdarskynjara, þrýstiskynjara, hitaskynjara og hæðarskynjara. Hann kynnist nokkrum gerðum af iðntölvum og notkun þeirra í iðnstýringum sem og tengingu við ýmsan jaðarbúnað. Megináherslan er lögð á að nemandinn læri að skilja virkni og uppbyggingu iðntölva og fái undirstöðuþjálfun í forritun og notkun forritunartækja og forritunarhugbúnaðar fyrir smærri iðntölvur. Þá er lögð áhersla á að nemandinn læri gerð flæðimynda fyrir stýringar, fái æfingu í gerð teikninga af iðntölvum og tengimynda fyrir þær sem og þann búnað sem þeim tengist. Auk þessa er áhersla lögð á að nemandinn nýti sér mælitæki til að finna tengivillur og bilanir og fái þjálfun í að tengja, prófa og mæla og taka saman niðurstöður.
RÖKV2LM03
Nemandi skal hafa öðlast þekkingu og skilning á:
skynjaratækni með áherslu á virkni rýmdar-, span-, hita-, hæðar- og þrýstiskynjara
helstu gerðum iðntölva, notkun þeirra í iðnstýringum og tengingu þeirra við ýmsan jaðarbúnað
uppbyggingu og virkni á litlum iðntölvum
gerð flæðimynda fyrir stýringar
IEC 1131-staðlinum sem gildir fyrir forritun á iðntölvum
helstu grunnskipanir í ladder-forritun
Nemandi skal hafa öðlast leikni í að:
nota forritunartæki og forritunarhugbúnað fyrir iðntölvur
teikna tengimyndir af iðntölvum og þeim búnaði sem tengist þeim, t.d. rofum og segulliðum, inn- og útgöngum
Nemandi skal geta hagnýtt þá almennu þekkingu og leikni sem hann hefur aflað sér til að:
umrita segulliðastýringar yfir í ladder-forrit
tengja iðntölvur og búnað sem tengist þeim á inn- og útgöngum
Námsmat er útfært í námsáætlun í samræmi við skólanámskrá.