Í áfanganum er lögð áhersla á að nemendur kynni sér reglugerð um raforkuvirki og kynnist því hvernig ákvæðum reglugerðar um öryggisþætti er framfylgt við verklegar framkvæmdir. Farið er í varnarráðstafanir, yfirstraums- og yfirspennuvarnir, búnað og efnisval með tilliti til nýframkvæmda, viðhalds og endurbóta á neysluveitum í rekstri. Kynntar eru vinnureglur Mannvirkjastofnunar, frágangur á umsóknareyðublöðum varðandi heimtaug, verktökur og úttektarbeiðnir. Farið er í vettvangsferðir í mismunandi neysluveitur og gerðar úttektir á þeim í samvinnu við rafverktaka. Einnig er fjallað um frágang á tilkynningarskyldum eyðublöðum til Mannvirkjastofnunar og rafveitu. Þá eru kynnt ákvæði reglugerða um raflagnir í skipum sem og ákvæði byggingareglugerðar er varða raflagnir og rafbúnað.
Grunnnám rafiðna
Nemandi skal hafa öðlast þekkingu og skilning á:
slysahættu í vinnuumhverfi rafiðnaðarmanna og helstu öryggisráðstöfunum gegn henni.
raforkukerfi og rafbúnaði í íslenskum skipum.
almennum kröfum í byggingareglugerð til raflagna og rafbúnaðar í mannvirkjum.
magni, gerð og staðsetningu á rafbúnaði í raflögnum fyrir íbúðarhúsnæði.
tengingum neysluveitna við lágspennudreifikerfi rafveitna.
fyrirkomulagi og frágangi á mælitækjum fyrir raforkunotkun.
grunnreglum um raflagnir bygginga, reglugerð um öryggismál og skilgreiningu íðorða um öryggi.
mismunandi gerðum dreifikerfa og almennum eiginleikum raflagna í byggingum, sem og kröfum til sérstakra lagna eða staða og sérákvæðum vegna staðsetningar virkja.
Nemandi skal hafa öðlast leikni í að:
leita sér upplýsinga um rafmagnsöryggismál.
velja búnað fyrir neysluveitur.
framkvæma öryggismælingar í neysluveitum.
framkvæma úttektir á neysluveitum í rekstri.
Nemandi skal geta hagnýtt þá almennu þekkingu og leikni sem hann hefur aflað sér til að:
greina galla í raflögnum og viðbrögð við þeim.
gera skýrslur um ástand raflagna.
velja efni og búnað samkvæmt kröfum í staðli og reglugerðum og sannprófa öryggi.
framkvæma öryggismælingar.
velja réttan öryggisbúnað og hlífðarfatnað.
bregðast við slysum á réttan hátt.
ganga frá tengingum fyrir orkusölu samkvæmt fyrirmælum.
beita helstu varnaraðgerðum gegn raflosti, hitaáraun, yfirstraum og spennutruflun.
Námsmat er útfært í námsáætlun í samræmi við skólanámskrá.