Í áfanganum er áhersla lögð á virka þátttöku nemenda sem meðal annars felst í því að stofna og reka fyrirtæki sem byggir á þeirra eigin viðskiptahugmynd. Nemendur koma sér saman um eina viðskiptahugmynd og gera viðskiptaáætlun byggða á henni. Þau þurfa að huga að fjármagni, markaðssetningu, framleiðslu og sölu. Kynnt eru grunnatriði sem hafa verður í huga við stofnun og rekstur fyrirtækis og til þess að koma vöru eða þjónustu á framfæri. Við rekstur fyrirtækjanna nota nemendur þá þekkingu, leikni og hæfni sem þeir hafa hlotið í öðrum áföngum. Ef tækifæri gefst munu nemendur taka þátt í aldurssvarandi frumkvöðlakeppni í framhaldinu eða samhliða áfanganum.
Nemandi skal hafa öðlast þekkingu og skilning á:
ferli þess að stofna og reka lítið fyrirtæki.
mikilvægi viðskiptaáætlana.
gerð einfaldra rekstrar- og efnahagsreikninga.
einföldum jafnvægis- og arðsemisútreikningum.
mikilvægi jákvæðra samskiptaleiða og farsællar samvinnu.
Nemandi skal hafa öðlast leikni í að:
taka ákvarðanir og bera ábyrgð á þeim.
vinna að raunhæfum verkefnum með ólíkum samstarfsaðilum.
gera kostnaðar- og/eða hagnaðargreiningu.
gera einfalda markaðsrannsókn, markaðsáætlun, auglýsinga- og kynningaráætlun, kostnaðaráætlun og söluáætlun.
Nemandi skal geta hagnýtt þá almennu þekkingu og leikni sem hann hefur aflað sér til að:
undirbúa og framkvæma krefjandi verkefni.
markaðssetja og selja vöru/þjónustu.
færa bókhald fyrir lítinn rekstur.
starfa í hópi sem felur meðal annars í sér samvinnu, virðingu, jákvæð samskipti, stjórnun, ábyrgð og ákvarðanatöku.
þróa viðskiptahugmynd að vöru/þjónustu og gera viðskiptaáætlun.