Í þessum áfanga er farið í helstu atriði og viðbrögð við óvæntum slysum og veikindum. Námskeiðið er bóklegt og verklegt. Áhersla er lögð á góðan skilning á efninu og færni í grunnendurlífgun og notkun hjartastuðtækja, meðhöndlun veikra og slasaðra. Farið verður m.a. yfir eftirfarandi þætti: streita í neyðartilfellum, tilfinningarleg viðbrögð eftir að hafa veitt skyndihjálp, sálrænn stuðningur og að forðast sýkingar. Einnig verður farið vel yfir fjögur skref skyndihjálpar; tryggja öryggi á vettvangi, meta ástand slasaðra eða sjúkra, sækja hjálp og veita skyndihjálp. Grunnendurlífgun, sjálfvirkt hjartastuð, áverkar og bráð veikindi.
Nemandi skal hafa öðlast þekkingu og skilning á:
Hinum fjórum skrefum skyndihjálpar.
Helstu áverkaeinkennum og réttum viðbrögðum við þeim.
Helstu einkennum bráðra veikinda og réttum viðbrögðum við þeim.
Nemandi skal hafa öðlast leikni í að:
Sýna rétt viðbrögð við slysum.
Meta ástand sjúkra og slasaðra.
Veita skyndihjálp við slys og bráð veikindi.
Nemandi skal geta hagnýtt þá almennu þekkingu og leikni sem hann hefur aflað sér til að:
Geta veitt sálræna skyndihjálp.
Geta veitt endurlífgun og geti beitt sjálfvirku stuðtæki i neyðartilfellum.
Geta bundið um sár og flutt sjúkling til við yfirvofandi hættu.
Geta sett sjúklinga í læsta hliðarlegu og tryggt þannig öryggi þeirra.
Námsmat byggist á áfangamarkmiðum. Þess skal gætt að námsmat taki til allra þátta námsins m.t.t. þekkingar, leikni og hæfni nemandans. Námsmat er í formi verklegs prófs og krossaprófs.