Í áfanganum er fengist við mat og markmið í samhengi við heilbrigði. Kynnt verða hugtökin vistspor, ábyrgð neytenda og matarsóun auk þess sem uppruni matvæla verður kannaður. Fjallað verður um helstu næringarefni og nemendur þjálfaðir í næringarlæsi matvæla. Varpað verður ljósi á áhrif matarvenja á líkamlegt- og andlegt heilbrigði. Einnig læra nemendur að elda einfaldan og hollan mat.
Nemendur læra helstu hugtök markmiðasetningar og eru hvattir til að setja sér markmið á hinum ýmsu sviðum. Námið byggist á hugmyndafræði persónumenntunar og því er ætlað að efla gagnrýna hugsun, sjálfsþekkingu, heilbrigðan lífsstíl, stærðfræði- og tungumálakunnáttu. Verkefnum er haldið til haga fyrir raunfærnimat á áframhaldandi námi.
Nemandi skal hafa öðlast þekkingu og skilning á:
næringarinnihaldi matvæla og áhrifum næringar og matarvenja á heilbrigði
meðhöndlun matvæla, nýtni og hvernig mismunandi hráefnanotkun endurspeglar bakgrunn og ólíkar framleiðsluaðferðir
mismunandi vistspori matvæla
markmiðasetningu
Nemandi skal hafa öðlast leikni í að:
afla sér upplýsinga
meta hvað er góð og hvað er slæm næring
lesa og skilja innihaldslýsingar á umbúðum matvara
vera meðvitaður um matarsóun
setja sér markmið
Nemandi skal geta hagnýtt þá almennu þekkingu og leikni sem hann hefur aflað sér til að:
greina upplýsingar um matvæli og næringu
tileinka sér heilbrigðar matarvenjur
vera ábyrgur neytandi
Leiðsagnarmat. Áhersla á umsagnir sem leiða nemandann áfram