Nemendur kynnast helstu þáttum þroskasálfræðinnar og þroskaferlum einstaklinga frá getnaði og fram á unglingsár. Fjallað er um líkamsþroska vitsmuna-, siðfræði- og tilfinningaþroska. Einnig er vikið að þroskahömlum og þær skoðaðar út frá líffræðilegu og sálfræðilegu sjónarhorni. Fjallað er um mismunandi þroskakenningar. Mótunaráhrif fjölskyldu og vina eru skoðuð og komið inn á vandamál barna og unglinga til dæmis geðræn-, tilfinningaleg-, líkamleg-, náms- og hegðunarvandamál.
SÁLF2IN05 eða áfangi á öðru þrepi í félagsgreinum.
Nemandi skal hafa öðlast þekkingu og skilning á:
- þroska mannsins út frá sálfræðilegum kenningum - þróun máltöku - helstu hugtökum og kenningum þroskasálfræðinnar - framlagi þroskasálfræðinnar innan sálfræðinnar og til samfélagsins
Nemandi skal hafa öðlast leikni í að:
- miðla sérhæfðri færni með því að beita almennum og sértækum vinnubrögðum, verkfærum og aðferðum - afla upplýsinga, greina þær og setja í fræðilegt samhengi - nýta fræðilegan texta á íslensku - miðla fræðilegu efni skýrt og skilmerkilega í ræðu og riti
Nemandi skal geta hagnýtt þá almennu þekkingu og leikni sem hann hefur aflað sér til að:
- vera betur í stakk búinn til að takast á við uppeldi eigin barna - tileinka sér frekara nám/starf á sviði uppeldismála - vinna úr rannsóknargögnum og leggja á þau mat - meta eigin frammistöðu og annarra á gagnrýninn hátt - taka þátt í rökræðum um málefni sem tengjast þroskasálfræði
Námsmat er tilgreint í kennsluáætlun og samræmist skólanámskrá.