Starfsþjálfun á stofu III er framhald af áfanganum Starfsþjálfun á stofu II. Áfanginn er samningsbundið nám undir leiðsögn iðnmeistara. Nemandi heldur áfram að takast á við raunveruleg verkefni í fyrirtækjum, þjálfar verktækni, fagleg vinnubrögð og bætir við fyrri kunnáttu. Verkefnin skulu vera í samræmi við þá þekkingu og færni sem nemandi hefur öðlast eftir 6 annir á snyrtibraut auk Starfsþjálfunar á stofu I og II. Miðað er við lögbundna 40 stunda vinnuviku í alls þrjá mánuði undir leiðsögn iðnmeistara í snyrtifræði. Fyrirtæki sem gerir samning um þjálfun nemenda á vinnustað skuldbindur sig til að fylgja þeim markmiðum sem tilgreind eru fyrir snyrtifræðinám og framfylgja þeim námsþáttum og verklegri þjálfun nemandans sem iðngreinin gerir kröfu um.
Í Starfsþjálfun III skal nemandi sýna aukna þekkingu, leikni og hæfni frá viðmiðum í Starfsþjálfun I og II.
Nemandi skal hafa lokið námi á 6. önn auk Starfsþjálfunar á stofu I og II samkvæmt námsbrautarlýsingu snyrtibrautar
Nemandi skal hafa öðlast þekkingu og skilning á:
starfsháttum á snyrtistofu þar með talið bókunarkerfi, tímastjórnun, undirbúning og frágang vinnusvæðis
mikilvægi hreinlætis og sótthreinsunar við störf þ.m.t. persónulegt, vinnusvæði, tækja og áhalda
að velja markvissa húðmeðferð og ráðleggja ábyrga notkun húð-og snyrtivara
snyrtivörum og efnum sem eru notuð í öllum verkþáttum greinarinnar
í hvaða tilvikum meðferð er viðeigandi og hvenær meðhöndlun er ekki ráðlögð
Nemandi skal hafa öðlast leikni í að:
undirbúa og ganga frá vinnusvæði samkvæmt viðurkenndum hreinlætisstöðlum
taka á móti viðskiptavini og veita markvissa ráðgjöf á faglegan hátt
greina þarfir viðskiptavinar og geta ráðlagt markvissa stofumeðferð og snyrtivörunotkun fyrir andlit, hendur, fætur og líkamann almennt
nudda markvisst höfuð, andlit og líkama með höndum og heitum steinum
lita augnhár og augabrúnir með tilliti til litavals samkvæmt þörfum viðskiptavinar
plokka, vaxa og móta augabrúnir samkvæmt þörfum viðskiptavinar
fjarlægja óæskilegan hárvöxt á mismunandi hátt og vinna með efni fyrir og eftir meðferð
framkvæma rafræna meðferð fyrir bæði andlit og líkama s.s. jónun, hátíðni, örstraum, LED meðferð, fótabor
framkvæma mismunandi sérmeðhöndlanir á andlit s.s. Ah-sýru meðferð
framkvæma mismunandi SPA sérmeðhöndlanir á líkama s.s. innpakkanir
framkvæma mismunandi sérmeðhöndlanir í hand- og fótsnyrtingu þ.m.t. parafín meðferð og gel lökkun
Nemandi skal geta hagnýtt þá almennu þekkingu og leikni sem hann hefur aflað sér til að:
skynja þarfir viðskiptavina og ráðleggja viðeigandi húðmeðferð og endurkomu
sýna viðskiptavinum virðingu og faglega umhyggju
sýna frumkvæði og framtaksemi við vinnu sína
geta ráðlagt og selt húðvörur á markvissan hátt og skynjað þarfir viðskiptavinar
sýna hæfni í mannlegum samskiptum og samstarfsvilja gagnvart samstarfsfólki
Námsmat byggist á ferilbók í öllum verkþáttum náms í snyrtifræði samkvæmt aðalnámskrá. Gert er ráð fyrir að ferilbók fylgi nemandanum þar sem gerð er grein fyrir verklegri þjálfun hans í vinnustaðanámi. Nemandi og iðnmeistari bera sameiginlega ábyrgð á skráningu ferilbókar. Einkunnargjöf í lok áfangans er staðið eða ólokið.