Nemendur sem hefja nám í þessum áfanga eiga að hafa fullt vald á bókhaldshringrásinni, geta hafið bókhald og lokað því samkvæmt reglum tvíhliða bókhalds. Í þessum áfanga er fyrri kunnátta dýpkuð verulega með flóknari færslum. Farið er yfir bókun á helstu reikningum fyrirtækja, notkun fyrningareikninga við afskriftir eigna, bókun hlutabréfa, skuldabréfa og annarra skuldaviðurkenninga og notkun affallareiknings. Einnig er farið yfir bókanir sem varða innflutning, tollafgreiðslu, greiðslu virðisaukaskatts í tolli, kostnað og fyrirkomulag við geymslu á vörum í tollvörugeymslu. Uppgjörsfærslum er haldið áfram, bæði í gegnum aðalbók og reikningsjöfnuð.
BÓKF1BA05
Nemandi skal hafa öðlast þekkingu og skilning á:
- hugtökum tvíhliða bókhalds - reglum tvíhliða bókhalds - helstu reikningum í fjárhagsbókhaldi - helstu lögum um bókhald og virðisaukaskatt
Nemandi skal hafa öðlast leikni í að:
- gera skil á færslum vegna innflutnings á vöru, helstu innflutningsskjölum, tollaafgreiðslu, greiðslu virðisaukaskatts í tolli og gengisbreytingum - reikna og bóka verðbætur, vexti og afborganir af verðtryggðum skuldabréfum - reikna afborganir og afföll af óverðtryggðum skuldabréfum - bóka kaup á hlutabréfum, arði, endurmati og sölu - bóka og gera upp virðisaukaskatt sem fellur í fleiri en eitt virðisaukaskattþrep - færa viðskiptamannabókhald - reikna og bóka laun í amk tveimur skattþrepum og gera skil á launatengdum gjöldum
Nemandi skal geta hagnýtt þá almennu þekkingu og leikni sem hann hefur aflað sér til að:
- bóka færslur sem varða stofnun og slit fyrirtækja - vinna með viðskiptamannabókhald, sérstaklega með tilliti til innheimtu og afskrifta á viðskiptaskuldum - byggja undir frekara nám í fjárhagsbókhaldi
Námsmat er útfært í kennsluáætlun í samræmi við skólanámskrá.