Megin viðfangsefni áfangans er næring íþróttafólks og mikilvægi réttrar næringar, m.a. hvað á að borða og hvenær á að borða, til að ná hámarksárangri í sinni grein.
Farið er yfir ráðleggingar Landlæknisembættis varðandi rétt mataræði. Fjallað um hver orkuþörf okkar er miðað við líkamsbyggingu og daglega hreyfingu. Farið nokkuð ítarlega í orkuefnin kolvetni, fitu og prótein, með þarfir íþróttafólks í huga. Skoðað er hlutverk og mikilvægi vítamína og steinefna í fæðunni og hversu mikilvægt er að vökvajafnvægi líkamans sé rétt. Fjallað verður um fæðubótarefni, hvaða næringarefni það eru sem verið er að sækjast eftir og hvenær er þörf á að borða fæðubótarefni eins og amínósýrur og kreatín. Einnig eru fæðubótarefni skoðuð með hliðsjón af ólöglegri lyfjanotkun. Farið er yfir hvað er átröskun og hvernig átraskanir koma fram í íþróttum.
Nemandi skal hafa öðlast þekkingu og skilning á:
- hvað fellst í því að velja rétt mataræði með tilliti til næringarinnihalds - hver orkuþörf okkar er yfir daginn með hliðsjón af æfingaálagi og hvernig hægt er að mæta henni á sem bestan hátt - hvað er fæðubótarefni og hvenær er þörf á að neita fæðubótarefna - hvað er átröskun, hvernig átröskun kemur fram í heimi íþróttanna og hvað ber að varast
Nemandi skal hafa öðlast leikni í að:
- skoða og meta mataræði sitt þannig að hann geti gert jákvæðar úrbætur - skoða og meta næringarinnihald matvæla þannig að hann geti valið réttasta kostinn - skoða og meta matarframboð í hans nánasta umhverfi þannig að hann geti valið réttasta kostinn
Nemandi skal geta hagnýtt þá almennu þekkingu og leikni sem hann hefur aflað sér til að:
- velja rétt mataræði og stuðla þannig að betri heilsu og líðan, og að ná sem bestum árangri í sinni íþrótt - geta metið hvað er honum fyrir bestu í mataræði og valið sér fæðu með gagnrýnum huga
Námsmat er útfært í kennsluáætlun í samræmi við skólanámskrá.